Hadhaa Ana!

... برشا حديث و حكيات




اذا كنت من الميسسورين باش تكون باعث للقناة – منيش نحكي على الأخ بائع السلاح- و تحب تزيد عدد المشاهدين, و تعرف انك ماش تحتاجهم لتلميع صورتك المتسخة أصلا بحكم أنك كنت من المقربين من آل طرابلسي و تعرف زادة أن بعد الثورة كل ما يرتبط بيهم من قريب و الا من بعيد مغضوب عليه و ملعون ... شنوا تعمل؟

ساهلة, و للاجابة عن الموضوع نجمو نسألو الأخ سامي الفهري لان عنده تجربة في برامج الاكس اكس أحّ و كذلك في التلحيس للطرابلسية و الخدمة ماعهم و زيد حاشته باش يزيد في نسبة متابعة قناته اللي ماش تتولى تلميع صورته .... الفهري الي جعل في القناة الوطنية – تونس 7- محطة لنشر عهره, و اللي بالطبيعة يدخل في باب تسييب الماء على البطيخ أو بالأصح الابداع الفني كيف ما يحاول انه يروجله سالف الذكراللي باين فيه مستعد يطرق جميع الأبواب لجمع الحشود و الرفع من شعبيته و شعبيّة قناته



اللقاء اللي بثته قناته, و اللي تنجمو تتفرجو فيه على راحتكم و مسؤليتكم باش اذا ثما شكون بحذاكم باش ما يسيئش بيك الضن و كذلك ما تحشمش روحك قدامه و بعدها تنجم تحكم وحدك اذا الحلقة هذه تنجم تتفرج عليها مع عائلتك؟ مع دار نسابك؟ مع خواتك؟ مع أولادك؟ ما نعرفش, احكم وحدك







رابط الفيديو على الفايس بوك


https://www.facebook.com/photo.php?v=256911714331833

البرنامج حلو برشا, فيه مبدعين, و مبدعات, يستاهلو كل احترام و تقدير, بالطبيعة أني مخي خامج برشا لدرجة أني نكبر في الحكاية, و شنية المشكلة وقت تسأل اي أنثى قداش من باكو بابي مشوار تستعمل ؟ و الا حتى قداش من رولو من أوراق الحمام؟ وقت اللي أحنا صرفنا صرفنا , فلذلك خليها تكون على قاعدة


و شنية المشكلة وقت تسأل  على برنامج و تحدد زمن بدأه و انتهائه؟ عادي ... تي هذه يدخل في توعية الناشئة


ماو" كل واحد وين عطاه ربي الشعر",و شنية المشكلة؟ 



هذا الكل يدخل في نطاق تسييب الماء على البطيخ, لأن المرحلة حساسة و الناشئة لازمتها توعية, و شنية المشكلة؟ ياخي نسمة ما كانتش مسرح للمجموعة من الشواذ؟ و شنوا العيب في الشذوذ وقت اللي ينادى به جهارا و يعتبر من الحرية الشخصية؟ تي عادي, شاذ أو شاذة في تونس وين المشكلة؟ ياخي مكانش ثما مجتمع متع شواذ كامل عنده حفلاته و تجمعاته اللي كانت تقام على مقربة من الداخلية و بعلم منها ورضاها و مكانش شكون يحكي معاهم في عهد بن علي؟



عادي و الله عادي, عادي انك تشوف المتربي و قليل التربية, عادي انك تخرج للشارع و تلقى شكون يربرب و يزيد يقول ما يحب, كله عادي, لان الحرية تقعد ديما منحصرة في الأخلاق المنحطة, و في نشر الرذيلة, و شنية المشكلة؟


لانه كله يدخل في تسييب الماء على البطيخ, واذا ما كفاكش البطيخ تنجم تزيد تسيب الماء على ما بقي من أخلاق, تحت اي شعار ترفعه لان في كل الحالات ماش تلقى شكون يسقفلك و يزد يشجعك, و يقلك يعطك الصحة أو بالأصح يشكر ولد الفهري اللي فهم الشعب اللي يحب اللعب, وفيهم كل صغير يحب يتعلم و كل كبير يحب يبدل الجو و يتفرهد, فهم شنوا لازم, باش يفرهد الشعب التونسي و يخليه شايخ في مخه على الأخر, لأنه مثماش" اذا عصيتم فاستتروا" و مثماش ترف احترام للمشاهد و للثقافته 


كله يهون, في سبيل جمع أكبر عدد من المتابعين اللي لازمنيك باش تولي مؤثر في المجتمع و تنجم تستغلهم في تطهيرك من رجسك الذي بلغ عنان السماء بمصاحبتك للطرابلسية و ان برأتك المحاكم, صحى ليك انت تاخذ بايك من الخبزة في عهد المخلوع و توا و غيرك اللي يستحق بالمجد رخضة اذاعة ما ياخذهاش, صحى ليك, انت عرفت كيفاش تصاحب السراق و تستفيد منهم وتلم على فلوسهم اللي خدموك باش تتلهاء بيها و زيد بعد الثورة ترفع قضية و تسترد ما جمد من أموال قال شنوا جبتها بذراعي وهي فلوس للشعب




الحاجة المتأكد منها, انه على هذا المنوال, سامي الفهري ماش يعمل قناة اباحية في تونس قبل 2020, تحت شعار , خلي الشباب يتثقف, و ممكن زادة تكون ناطقة بالعربية و مقرها تونس و ممكن يكون الاستوديو متعها ملحق بالاستوديو متع التونسية باش مذيعي الغلبة ينشطو في الزوز, بحكم خبرتهم سواء عبر مشاهدتهم للقناوات الأجنبية و الا عبر عملهم مع عرفهم





4 commentaires:

عادة الي يعطي دروس أخلاقوية كيفك بسبان العباد يكون يخبي في عقدة شخصية ، يعني أكثر ناس تجاهربعدائها للمثليين في العادة هي نفسها غارقة في مثليتها للعنكوش و تحاول تبعد الشبهة على روحها بالمبالغة في تمثيل دور الواعض الي يدعوا لرجم الشواذ بين قوسين تعرف نصك مثال صارخ لفكر ينطلق من و يصب في النصف الاسفل ، عقد كبت و تخلف ، تقيؤات نفسية قال الراجل

خليو الناس تخدم و تبدع و تعيش و عندكم إمارات اسلامية برشه تنجموا تمشيو تعيشوا غادي في أرض الاسلام و التخلف

كيف الي هي جنتكم الموعودة موش ماخور سماوي مفتوح و تراثكم موش الكل يا قتل يا سبي و اغتصاب و غلمان

و تشترط عدم الخروج عن نطاق الأدب فتأدب أنت من باب أولى

صاحبي البرنامج موش عتجبك بدل القناة ساهلة برشا الحكاية و يزينا من العهر الفكري اللي عندكم وليتوا كيف الحارزة في الحمام شادين العسة على كل شي و انتوما ما تعملو في شي برا صاحبي لافغانستان و عيش في المدينة الفاضلة اللي تحبو عليها

فاقد الشي لا يعطيه...يعني تحبو من القروي و باعث القناة و الفهري انهم ينشرو الاخلاق الحميدة و القيم الاصيلة؟؟؟؟ ..

ياخي اللي يعتير نفسو التلميذ النجيب لانديمول في تونس تسنو منو حاجة تفيد الشباب؟؟؟
و زيادة اللي احترف صنعة التلحيس للكبارات..باش يبطل الصنعة و قت تتبدل الكبارات؟؟؟
اما بالنسبة لنوفل الورتاني..شنوة الجديد زادة ..هي نفس الايحاءات اللي كان يعمل فيها في بروتكاست و ميدي شو في موزائيك..تي اصلا اش تستناو منو و هو اللي يعتبر كلام شيخو الطالبي اكبر من مخاخ التوانسة..بحكم ان نوفل مخو اكبر منا و ينتمي للنخبة اللي تفهمو واللي هي وصية على ارادة الشعب الجاهل المسكين الرجعي

Hada Ana Merci farhadtli 3ala kalbi !!Le prof

Enregistrer un commentaire

بسبب بعض المشاغل و القراية منّتجمش نتابع المدونة بشكل دوري, متقلقش اذا التعليق خذا وقت باش يتم ادراجه و الكلام الزايد يجعل ادراج تعليق صعيب شوية, نقص منه و تفضل قول اللي تحب , بالتوفيق

TUNISIA

TUNISIA

من أجل تدوين نظيف

!هذا أنا

Ma photo
حروف مبعثرة...برشا حديث وحكيات... كيف كل الناس

هذا أنا

بلوغ مثل اي بلوغ أخر.. موش لازم تقلق برشى من هذه الناحية ..... الايام كفيلة باش تعطيك الصورة الادق على المحتوى

أقوال تروقني

أنا من أشد المؤمنين بالحظ، وقد لاحظت أن حظي يزداد كلما زاد عملي

توماس جفرسون
الرئيس الثالث للولايات المتحدة الأمريكية

ضيوفنا الكرام