Hadhaa Ana!

... برشا حديث و حكيات


ضحك على الذقون

فرحت و فرح كل تونسي كره نظام بن علي بعد أن هرب من حكمنا بالحديد و النار منذ 23 سنة و تكشفت برشا أوراق قذرة و مؤمرات كانت تحصل و الكثير من الغسيل الوسخ نشر أخيرا, لكن في المقابل ما يزمناش ننساو حاجة , و هي ان ثما شكون خسر فيها الثورة هذه, ثما اللي قلب الفيستا في لمح البصر, أشخاص كانت بالامس تضفي في الشرعية على بن علي و من جاوره و اليوم بدات تعمل في محاظرات على الثورة و الحرية و الكرامة و بدات تنشط تحت مسميات جديدة كيف المجتمع المدني


ثبتو فيهم و أتو تشوفو بندير كبير, باع كرامته بالامس في سبيل نعيم زائل, شخص قبل باش يكون مع الجلاد


في الحومة عندي خمسة من الجيران الي كانُ مخبرين و يكتبو في التقارير, منهم عامل بمعهد و منهم شكون أستاذ جامعي في الاقتصاد, هز القفة لين تعب و في النهاية جاء على برّة, المجموعة هذه تضرت برشا من الثورة و خسرت برشا من مكاسب و من استغلال لمال الشعبة منهم شكون كان يسكر كل ليلة في الشعبة باموال التجمع, هذه مجرد عينة من اللي تضرو و ثما شكون الى الان يتحسر على بن علي خاصة أنهم من اللي دبرو خدمهم كيف اللي في التصويرة السابقة, بالفرينة و بالتملق


هو سؤال يطرح نفسه علاش قلبو الفيستا؟ هل مجرد منصب ؟ أم ان السياسة تغير الرجال خاصة وقت نشوفو أن المعارضة اللي كانت في عهد بن علي كل نهار تصدر في البنات تجي اليوم في حكومة انتقالية و تقبل بالمناصب و من يومها معادش تشوف بيان يندد و الا يستنكر, أش صار؟ للاسف حتى اللي كان عامل فيها نضيف طلع على مراد الله, طلعُ قلبو الفيستا و كل همهم هي المناصب, شكون من الاحزاب اللي توا في السلطة استنكرت اللي صار في سيدي بوزيد أو في الكاف؟ الأحزاب هذه اللي ما عندهاش قاعدة شعبية و تجي تحكي باسم الشعب, على شكون تضحك؟


اليوم رجعت الهوة بين الشعب و الحكومة, و مناش قاعدين نفهمُ في بعضنا, ممكن يطلع واحد هنهم بعدين و يقوللنا: "الله غالب غلطوني" أما للاسف ما يقلوش المناصب خلاتنا نقلبو الفيستا و معادش ثما بينات الاستنكار وقت وصلنا للعين, و شربنا منها, خاصة ان ثما شكون فيهم مكانش يحلم باش يقابل وزير فاذا بيه يصبح هو الوزير, هو الأمر و النهاي و الاكثر من هذا معادش يفهم في مطالب الشعب, أما هانهم يتكسبو من الثورة, من دماء الشهداء, منذ عدة أيام صادقت الحكومة على معاهدة يتم بمقتضها الغاء عقوبة الاعدام و ان كنت الى حدود ايام معدودة أرفض هذه العقوبة الا أني عدلت عن رأيي, و الأن نحب نفهم, كيفاش حكومة انتقالية تنظر في مثل هذا الموضوع اللي ما سمعتش شكون على الساحة وصل وطرحه, اليوم نحب عقوبة الاعدام تطبق على القناصة اللي قتلو المحتجين بصراص مباشر في الرأس أو العنق أو حتى في القلب, نحب العقوبة تطبق على اللي أشعل في تونس النار عبر سياسة الارض المحروقة أو عبر محاولة شق الصف التونسي, اذا بالمجد تحبو تلغيو الحكم هذا فاما ان يطرح على نواب يختارهم الشعب للتصويت عليه أو يتم استفتاء موش يجي شكون ما اختاروش الشعب باش يقرر و يخرج علينا بخبر بعد ما تم اقراره, ت يماكم شاورو, و الا البلاد دار الوالد؟


و في المقابل كل نهار تقريبا ثما مظاهرة تطالب بحل التجمع, و الى الان السادة الكرام ما تلفتولناش, بربي حلو علينيكم و شوفو بشنو يطالب الشعب


ثما اجماع على حل التجمع و الحكومة ما على بالهاش, ثما مطالبة بالتحري في الفساد في حين أن جراد و غيره و اللي يطعن في نزاهتهم موجودين كأعضاء باش ما يتحاسبوش


ثما مطالبة باجتثاث التجمع, و اللي البعض يحاول أنه يرفضها على اساس ان في تونس ثما 2 ملاين من التجمع, لكن هنا المغالطة متع الانتهازيين, و هي أن بطاقة الانخراط كانت توزع على كل شخص و توصله للدار

و في المناطق الفقيرة يتم ابتزاز المواطنين من المشايخ اللي عملو مظاهرة للمطالبة بالحقوق متعهم, مشايخ السوء هاذم كان العديد منهم يفرضو على المواطنين اللي يحبو ياخذ بطاقة علاج أو شهادة فقر أو اي ورقة ان يكون عندهم انخراط في التجمع, و كان كيف برشا من الكلاب الشرسة متع التجمع اللي كانت تساهم في تشكيل اليد الحديدية متع بن علي, و اللي هما قلة, لانهم المجموعة الانتهازية التي تستغل النفوذ متعها واللي كانت عاملة محاكم التفتيش


و الي يوم قلبت الفيستا تي الغرياني اللي أمس قلب الفيستا باش ياخذ منصبه في التجمع قال في تصريح أنه كان يشعر بالاسف على الوضع في عهد بن علي........ضحك على الذقون


ثما مطالبة بمعاقبة الأمن المتورط في البطش و بكلنا شفنا مظاهرة للامن, و عناصر أمنية تقول خاطينا, و تقول نحب نبداو صفحة جديدة, و بكلهم جبدو يديهم و بداو يقولو: موش أنا اللي ضرب , موش أنا اللي قمع,


الأعوان هاذم كل واحد فيهم جبد يده و قال خاطيني:
















المصدر:
http://www.facebook.com/video/video.php?v=176643785712277



ملا شكون؟ بن علي حكم 23 عام و اللي قبله كان كيفه في تعامله مع الشعب عبر الجهاز البوليسي و توا يجيو يقوللنا خاطينا, و بكلهم نضاف...ملا أكيد أنا اللي كنت ناخذ في الرشوة باش ما يتعداش محضر و الا باش نورط شخص لمجرد النكاية بيه, أما توا تحول السرياطي الى شماعة .... و أكيد أنا اللي في التصاور هذه







و اليوم رئيس اقليم الامن اللي ضرب مرا في الكاف, هذا خاطيه زادة؟ و الاعوان اللي قتلو زوز موقوفين في سيدي بوزيد خاطيهم؟


هذه هي الصفحة الجديدة اللي حبو يبداوها, و واهم من يعتقد أننا تحررنا, ميزالت الثنية طويلة و يكذب اللي يقول العكس, هرب البغل و قعدت الكريطة بما فيها من مليشيات التجمع اللي وجد عن كوادر منه أسلحة استخدمت للتخريب و الترويع و القتل و حمل المواطنين على مهاجمة البعض قصد تغيير نظام الحكم باقوة, و ميزا لثما زبانية النظام البائد من عناصر أمن الدولة و الأمن السياسي اللي يديهم ملطخة بالدم و اللي قامُ بالتعذيب وانتهاك الحرمات و الترويع ... هرب البغل و قعدت الكريطة و اذا لم تفكك العصابة ممكن ياسر يجيبو بغل جديد و يكملو المشوار, تي هما بداو في رص صفوفهم و متجهزين , و حصل اجتماع على مستوى احدا لجان التنسيق مع مجموعة من متخرجي الاكادمية السياسية من الشبان و كان الكاتب العام متعها يقول: ما تبدل شيء, ما يلزمكمش تخذلو التجمع و كونو مستعدين لتلبية النداء


ميزال ما تبدل شيء و اذا لم يتم تفكيك التجمع و اعلان ميثاق وطني لدولة مدنية و البدأ في تحقيق جدّي ضد الفساد و تطهير الامن من القذرات اللي معبي بيها و في نفس الوقت القيام برسكلة للعناصر الامنية باش يفهمو أنهم موش فوق القانون , و ان القانون اللي يطبق على الشعب يطبق عليهم, و الا ستذهب دماء الشهداء هباء و تعود حليمة الى عادتها القديمة و نرجعو وين كنّا


واذا مكمش مصدقين شوفو اللي صار مع المواطن هذا في المطار











http://www.facebook.com/video/video.php?v=132043436861647


هذا مجرد مثال, و الامثلة كثيرة منها اللي نعرفوه كيف اللي صار في الوردانين و مقتل 6 من المواطنين بالرصاص ة اللي صار في القصبة ثما زادة اللي ما نعرفوهش و مستسرين عليه أعوان الأمن - تسمية غير صحيحة - الافاضل كثير جداا




0 commentaires:

Enregistrer un commentaire

بسبب بعض المشاغل و القراية منّتجمش نتابع المدونة بشكل دوري, متقلقش اذا التعليق خذا وقت باش يتم ادراجه و الكلام الزايد يجعل ادراج تعليق صعيب شوية, نقص منه و تفضل قول اللي تحب , بالتوفيق

TUNISIA

TUNISIA

من أجل تدوين نظيف

!هذا أنا

Ma photo
حروف مبعثرة...برشا حديث وحكيات... كيف كل الناس

هذا أنا

بلوغ مثل اي بلوغ أخر.. موش لازم تقلق برشى من هذه الناحية ..... الايام كفيلة باش تعطيك الصورة الادق على المحتوى

أقوال تروقني

أنا من أشد المؤمنين بالحظ، وقد لاحظت أن حظي يزداد كلما زاد عملي

توماس جفرسون
الرئيس الثالث للولايات المتحدة الأمريكية

ضيوفنا الكرام