Hadhaa Ana!

... برشا حديث و حكيات




اذا كنت من الميسسورين باش تكون باعث للقناة – منيش نحكي على الأخ بائع السلاح- و تحب تزيد عدد المشاهدين, و تعرف انك ماش تحتاجهم لتلميع صورتك المتسخة أصلا بحكم أنك كنت من المقربين من آل طرابلسي و تعرف زادة أن بعد الثورة كل ما يرتبط بيهم من قريب و الا من بعيد مغضوب عليه و ملعون ... شنوا تعمل؟

ساهلة, و للاجابة عن الموضوع نجمو نسألو الأخ سامي الفهري لان عنده تجربة في برامج الاكس اكس أحّ و كذلك في التلحيس للطرابلسية و الخدمة ماعهم و زيد حاشته باش يزيد في نسبة متابعة قناته اللي ماش تتولى تلميع صورته .... الفهري الي جعل في القناة الوطنية – تونس 7- محطة لنشر عهره, و اللي بالطبيعة يدخل في باب تسييب الماء على البطيخ أو بالأصح الابداع الفني كيف ما يحاول انه يروجله سالف الذكراللي باين فيه مستعد يطرق جميع الأبواب لجمع الحشود و الرفع من شعبيته و شعبيّة قناته



اللقاء اللي بثته قناته, و اللي تنجمو تتفرجو فيه على راحتكم و مسؤليتكم باش اذا ثما شكون بحذاكم باش ما يسيئش بيك الضن و كذلك ما تحشمش روحك قدامه و بعدها تنجم تحكم وحدك اذا الحلقة هذه تنجم تتفرج عليها مع عائلتك؟ مع دار نسابك؟ مع خواتك؟ مع أولادك؟ ما نعرفش, احكم وحدك







رابط الفيديو على الفايس بوك


https://www.facebook.com/photo.php?v=256911714331833

البرنامج حلو برشا, فيه مبدعين, و مبدعات, يستاهلو كل احترام و تقدير, بالطبيعة أني مخي خامج برشا لدرجة أني نكبر في الحكاية, و شنية المشكلة وقت تسأل اي أنثى قداش من باكو بابي مشوار تستعمل ؟ و الا حتى قداش من رولو من أوراق الحمام؟ وقت اللي أحنا صرفنا صرفنا , فلذلك خليها تكون على قاعدة


و شنية المشكلة وقت تسأل  على برنامج و تحدد زمن بدأه و انتهائه؟ عادي ... تي هذه يدخل في توعية الناشئة


ماو" كل واحد وين عطاه ربي الشعر",و شنية المشكلة؟ 



هذا الكل يدخل في نطاق تسييب الماء على البطيخ, لأن المرحلة حساسة و الناشئة لازمتها توعية, و شنية المشكلة؟ ياخي نسمة ما كانتش مسرح للمجموعة من الشواذ؟ و شنوا العيب في الشذوذ وقت اللي ينادى به جهارا و يعتبر من الحرية الشخصية؟ تي عادي, شاذ أو شاذة في تونس وين المشكلة؟ ياخي مكانش ثما مجتمع متع شواذ كامل عنده حفلاته و تجمعاته اللي كانت تقام على مقربة من الداخلية و بعلم منها ورضاها و مكانش شكون يحكي معاهم في عهد بن علي؟



عادي و الله عادي, عادي انك تشوف المتربي و قليل التربية, عادي انك تخرج للشارع و تلقى شكون يربرب و يزيد يقول ما يحب, كله عادي, لان الحرية تقعد ديما منحصرة في الأخلاق المنحطة, و في نشر الرذيلة, و شنية المشكلة؟


لانه كله يدخل في تسييب الماء على البطيخ, واذا ما كفاكش البطيخ تنجم تزيد تسيب الماء على ما بقي من أخلاق, تحت اي شعار ترفعه لان في كل الحالات ماش تلقى شكون يسقفلك و يزد يشجعك, و يقلك يعطك الصحة أو بالأصح يشكر ولد الفهري اللي فهم الشعب اللي يحب اللعب, وفيهم كل صغير يحب يتعلم و كل كبير يحب يبدل الجو و يتفرهد, فهم شنوا لازم, باش يفرهد الشعب التونسي و يخليه شايخ في مخه على الأخر, لأنه مثماش" اذا عصيتم فاستتروا" و مثماش ترف احترام للمشاهد و للثقافته 


كله يهون, في سبيل جمع أكبر عدد من المتابعين اللي لازمنيك باش تولي مؤثر في المجتمع و تنجم تستغلهم في تطهيرك من رجسك الذي بلغ عنان السماء بمصاحبتك للطرابلسية و ان برأتك المحاكم, صحى ليك انت تاخذ بايك من الخبزة في عهد المخلوع و توا و غيرك اللي يستحق بالمجد رخضة اذاعة ما ياخذهاش, صحى ليك, انت عرفت كيفاش تصاحب السراق و تستفيد منهم وتلم على فلوسهم اللي خدموك باش تتلهاء بيها و زيد بعد الثورة ترفع قضية و تسترد ما جمد من أموال قال شنوا جبتها بذراعي وهي فلوس للشعب




الحاجة المتأكد منها, انه على هذا المنوال, سامي الفهري ماش يعمل قناة اباحية في تونس قبل 2020, تحت شعار , خلي الشباب يتثقف, و ممكن زادة تكون ناطقة بالعربية و مقرها تونس و ممكن يكون الاستوديو متعها ملحق بالاستوديو متع التونسية باش مذيعي الغلبة ينشطو في الزوز, بحكم خبرتهم سواء عبر مشاهدتهم للقناوات الأجنبية و الا عبر عملهم مع عرفهم








هو ذكر من أشباه الرجال, قد بلغ الأربعين أو يزيد, لم أرتح له يوما و لم أجد فيه ما يجعلني أحترمه أو أبادله التحية يوما, كان أول أمره أن اكترى دكان بجوار بينا, يوم لازلت أذكره, كان الفصل شتاء و كنت أجهل من يكون, و اذا بأحدهم قد فتح بجوار البيت مطعما للوجبات السريعة

 يومها كان حيي معقلا لمجموعة من المجرمين من أولاد الحي قضى زعيمهم ما يزيد عن ثلاث أرباع عمره الذي تجاوز الخمس و الثلاثين في السجن, وكان هناك أيضا من حكم عليه بثلاث عشر سنة في قضية تكوين عصابة و كذلك الشأن مع غيره, من رفقاء السوء, لم أعرف المخبر و ما هدفه إلا بعد أن أسر اليا أحد الجيران من معارفه بهويته و أنه كان يترصد أحد الذين أذاق الأمن في مدينتي الأمرين, من تهشيم لسيارة الشرطة و حتى الاعتداء على رئيس مركز الأمن و مجموعة أخرى من الأعوان


مرت السنين و كنت أراه أحيان و كثير ما كنت أشيح عنه بصري لما يسببه لي من قرف و تعكير مزاج, و منذ سنية أو يزيد لما دخلت المسجد وجدته أمامي, هم بتحتي قبل أن أستدير و أتقدم إلى أول الصف و كأنني لا أعرفه ولا في حياتي رأيته ... تكرر المشهد مرارا و تكرارا و أنا أرفض حتى الوقوف بجانبه في الصف, فالمخبرون في شريعتي رجس أتحاشاهم, ليس وحده بل ان أب أحد أصدقاء الطفولة الذي علمت انه مخبر لما بدأت أهتم بالسياسية ... ما عدت أرد عليه التحية ولا حتى النظر في وجهه حتى ان بادرني بها, فكلهم رجس و  كلهم للجلاد زبانية و عبيد


كان مخبرنا الذي اتخذ المسجد مقر عمله, يطيل اللحية و يلبس القميص و على رأسه في بعض الأحيان شاشية, و أشياء أخرى ... كان يواظب على الصلاة جماعة و في رمضان يكاد يكون من المعتكفين,اذا كنت من أهل اليمين و رأيت حاله قلت انه من المعتصمين بحبل الله القابض على دينه وإذا كنت من أهل اليسار و رأيت ما هو عليه لقلت أنه قادم من جبال أفغانستان أو هكذا يخيل إليك


بعد أن واظب على الصلاة جماعة واتخذ أحد الشباب أخ له في الله وكان صاحبه من الذين يلبسون القمصان و يطلق لحيته .... و صار للمخبر رفيقا وهو لا يدري, أم تراه عرفه و أسر الأمر بينه و بين نفسه, لا أدري, فما شعور من يصاحب الضبع وهو يعلم غدره و سوء خلقه


كان يطول الحديث بينهما بين نقد لحال البلاد و بين مناقشة مواضيع فقهية ... مرت الأيام و كان يواظب على الصلاة في الصف الأول و ينافس المجتهدين في عبادتهم و لكن قل منهم من عرفه على حقيقته


تمر الأيام وأنا على حالي, أمقته وأمقت كل ما يذكرني به و أمقت رفاقه الذين صاحبوه في حيي يوم أن كان "باعثا لمشروع" فيه,  مرت الأيام و خرج من وكره بعد أن قضى فترة الثورة مختفيا عن الأنظار بعيدا عن بيته ... ليس وحده فكل المخبرين في حيي عادوا للنشاط سواء عبر الأحزاب و إلا عبر بعض الجمعيات


و منذ أيام و بينما كنت عائدا للبيت بعد الصلاة مر أمامي و رائحة المسك تنبعث منه, تشمها على بعد عشرة أمتار أو أكثر, لم أتمالك نفسي و شعرت بالغثيان ... غيرت مساري و لم تغادرني رائحة المسك التي انبعثت منه إلا بعد وقت طويل و جعلتني أعاف نفسي و ما حولي


انّي الأن على يقين أني اذا ذهبت الى صلاة العيد لوجدته أمامي في الصف الأول, على هيئته التي وصفت


تبا ... لقد عاد للعمل مثلما كان, و هل تراه انقطع عنه يوما؟ أم أن شيء لم يتغير في هذه البلاد؟ أم أنه يحاول البقاء على إطلاع على ما يحدث حوله حتى إذا طلب من العودة إلى كتابة التقارير كان لمن حوله بالمرصاد؟







كل ما نمشي للمكتبة اللي بحذا الدار الا و تعرضني رصفة من الجرائد اللي ما تستاهلش باش يضيع الانسان وقته عليها, لكن في بعض الأحيان نكون مجبر باش نشوفها من القلق, وقت يطلب مني صاحب المكتبة باش نستنا شوية فاكون مخير بين ان أبقى محدقا في اللا شيء "مزبهلا" و الا استرق النظر الى ما تكدس من جرائد, فترى انها جرائد ما تسواش حق الورق و الحبار, جرائد امتهنة التشويه, كيف انها تقول كون سمير الفرياني اصبح صديق عماد الطرابلسي الشخصي و بعد جمعة تقلك ان عماد الطرابلسي الللي عاديش في غرفة منعزلة يعتكف على قراءة القران, شنوا اللي تبدل؟ في الاولى ماحاولة لاصاق الشبهة بسمير بانه مقرب من الطرابلسية و في الثانية محاولة لتلميع صورة السفش عماد اللي نتصور انها اول مرة يشد في يده كتاب في حياته



هذا الكل في كفّة, اما وقت تحل الفايس بوك باش تتطلع على أخر الأخبار تشوف صحافة صفراء من نوع فاخر, لانها موجودة على الانترنات و ان كان عندها نسخة مطبوعة, وهنا ما نجم كان نذكر موقع " تونيفيزيون " اللي مهبط ارتيكل كامل على صلاة العيد اللي ماش تقام على الشاطئ و الا في الملعب البلدي بالقلعة الكبرى – سوسة- , السؤال اللي يطرح نفسه, وقت البلدية قبلت انها تعطي ترخيص شنية المشكلة؟ منيش ماش نحكي على الحكم الشرعي للصلاة في المصلى اللي هي اصلا من السنة ووردة عن رسول الله صلى الله عليه و سلم, لكن علاش التركيز عليها من طرف الموقع السالف الذكر و معها مجموعة أخرى من الاذاعات ؟ لو كانت ماش تقام حفلة لاي فنان كان, هل كانت ماش تولي مثيرة للاشمئزاز كيف ما حاول البعض انه يصورها؟ و الا بهامة و الا اي عبارة اخرى توصف عدم رضى الصحافة الصفراء على الموضوع؟

ياخي وين مشات حرية التعبير و ممارسة الشعائر الدينية؟ و الا تحظر و تغيب ؟ و علاش الحكاية ولا فيها إنّ؟ و الا كل حدث يصير الا و يربط بالنهضة؟ أو اي تيار أخر من اليمين, ؟ موش أول مرة تصير, لكن موش ماش تكون أخر مرة,


هذا الكل في كفة, لكن الكيل بمكيالين, وقت حصلت الفازة متع الافريكا اللي بعد ما هدات الأجواء شاف الناس الوجوه النيرة اللي قامت بيها و اللي تخدم على بعد اقل من 200 ميترو من مكان الحادث , ذهلت من حجم الاستنكار اللي صار و كيفاش لازم يتم التصدي ليه, لكن وقت قامت مجموعة من الشباب بالهجوم على مسجد و التعدي على حرمته ما شفت حتى استنكار, تعرف علاش؟ لان عبد الفتاح مورو كان موجود فيه, و مجرد وجوده في مسجد سواء كان يقدم في درس و الا لا فانه يبيح انك تدخل و تستعمل العبرات النابية و سب الجلالة, هذا الكلّ يدخل في حرية التعبير و التصدي للضلاميين

وقت قامة مجلة تونيفيزيون بنشر صورة للأخت كنزة, بوركت و دامت ذخرا للوطن و هي في بيكيني – جزئي-




كانت حرية صحافة و كان من بين التعليقات اللي أذهلني ردّ لسيدة فاضلة على أحد الذين انتقدوا انها لم تراعي مشاعر المسلمين في رمضان:




ياخي شنية الحكاية؟ صورة مثيرة في رمضان و الشعب صايم ميسالش وصلاة عيد في المصلى وجعتكم؟ و الا هذا يدخل  في باب الكيل بمكيالين؟ و الا ثما شكون عنده شوية فوبي من كل ما قد يوحي بانه اسلامي؟ الا بالطبيعة النسخة الحداثية من الاسلام اللي تتلخص في الطالبي و يوسف صديق و ألفة يوسف...


في مصر ستقام صلاة العيد في ميدان التحرير رغم رفض الشرطة العسكرية لذلك و مع هذا ما شفتش الهجمة اللي صارت عندنا على نفس الموضوع, رغم انه منحصر الى حد الان في بلاصتين, و الا شنوا كان ممكن يصير لو ثما شكون قال: نحبو نعملوها في القصبة؟

 يزي بلا تجربيع!



السلام عليكم,

اعلم رعاك الله أن الثورة نوعان, نوع ناجح يأتي بما يناقض العهد الذي سبقها و أخر فاشل قد يغير في الشكل لكن يحافظ على المضمون 

لكن بحمد الله, في ثورة تونس, أصبح الكورة تلعب بين وزارة الدفاع و الداخلية , فالأولى تقر بوجود قناصة و الثانية تنكر على لسان سيء الذكر و الخلق توفيق الديماسي و تطالب بدليل, لأن الكذاب اللي يكذب كذبة و يقول انهم اشاعة كيف ما قال السيد السبسي, بعد ما يخلي من حوله يصدقها يولي حتى هو من المؤمنين بها و المدافعين عن صحتها

في تونس ما بعد الثورة, تشوف المدنيين يحاكمون محاكمة عسكرية و القتلة الملطخة أيديهم بالدماء يطالب بتحويلهم الى إلى محاكم مدنية

في تونس ما بعد الثورة, يطلع شكون يقلك ان اللي عمل الثورة هم من التجمعيين و الدساترة, اللهم اذا كان يعلم الغيب و الا تم ادراج أسمائهم بغير علم أصحابهم,

في تونس ما بعد الثورة, يموت جرحى ثورتنا في المستشفيات الغير مجهزة بمعدات قادرة على شفائهم .

اليوم في تونس ما بعد الثورة, و بعد صراع دام 8 أشهر قضها مقعد في فراشه و لا يجد من يتذكره ولا يواسيه في محنته, توفي جريح ثورتنا حسونة بن عمر



مات و لا نعلم ان كان قالته قد اعتقدل و الا تم التستر عليه من طرف وزارة تحتكر التظاهر السلمي و تقمع كل من يخالفها, وصلت حد قمع أعونها الذين شقوا عصى الطاعة, لكنها لا تتردد في ترقية كل من تلطخت يداه بالدماء, مات ولم يأخذ حقّه و نسيه أبناء موطنه


هوما و نحنا, وزراة الداخلية كمثال


في تونس تشوف العجب ....في كل مرة تصير مظاهرة الا و تشوف العجب, العجب ممكن يختلف بحسب نظرتك للوضع التونسي و حسب خلفيتك الفكرية, لكن اللي غلب عليا هو اللي قاعد يصير في كل مرة من طرف وزارة الداخلية اللي ميزالت متمسكة بما قبل 14 جانفي و اللي الى الان يعمل في سياسة اللمناعة, موش مشكلة اذا ترحك مشطة في مواطن و الا يقعدوه على متراك والا شقف لانه كله يدخل في الحفاظ على الامن و الامان اللي يحيا بيه الانسان في قمعستان



الغرائب تتنوع, لان الاولى هي ادعاء الناطق باسم الداخلية ان المتظاهرين ضربو الاعوان الغاز, رغم ان الفيدوات اللي يتم ترويجهم في الفايس بوك تثبت العكس, و ناقص كان بيان من الداخلية يدين استخدام المواطنين للعنف المفرط ضد الامن, و اقداهم على اختطاف مجموعة من الاعوان و الاعتداء عليهم بالفاحشة, علاش لا؟ و الا المفاحشة ما تصير الا من طرف الاعوان و يكون ضحيتها المواطن و المتظاهر؟

السيد هشام المؤدب, اللي للاسف اسمه يخالف الواقع, لانه الاوالى يتسمى هشام الكذاب او الافاك او الزفلات او البلعوط ...الخ الخ الخ, يكذب و ما يحشمش, لم يستحى ان يكون شكون في عمره يكذب, و ما يحشمش ان شخص في منصب كيف منصبه و يزيد يكذب

في تونس تشوف العجب .... وزارة تهبط بيان و تدعمه بالتصاور لعون امن مصاب




و تغض الطرف على صغير تم تعنيفه بشكل مفرط


مع العلم ان اقل شخص يخرج من بين يديهم يعدي نهار في السبطار في حين لو سألنا طبيب قداش من نهار تعطيه العون المصاب؟ ممكن يقلك هز روحك و اخرج من قدامي .... في تونس تشوف الضرب بشماتة, و تشوف الضرب اللي تعرفه انه موش الهدف منه منع الشغب و انما عقوبة على المس بنظام بن علي و على حلان فمك, لان اللي يحل فمه يحل عليه سخط الاعوان و الوزارة

 و قضية سمير الفراني اللي مجرد انه كتب مقال رصاتله في قلبه, و الغريب في الامر ان النهار اللي صارت مظاهرة تطالب باطلاق سراحه, كان عدد الاعوان المجندين لتطويق المظاهرة اكبر من عدد الزملاء متعه اللي واقفين معاه


في تونس تشوف متظاهرين يطابلو بمطالب مشروعة, و مطالب تجلب المصلحة العامة, فيتم مقابلهم بالغاز و القمع, رغم انه اذا حصلت اصلاحات فان عائلة البوليس اللي يضرب بالمتراك تستفيد كيفها كيف بقية الشعب,


في بريطانيا يصير شغب و حرق للممتلكات العامة و الخاصة و اعتداء على الافراد


فيكون الرد من الامن, ابعد ما يكون على اللي يصير في تونس الي  تشوف فيها بوليس الحجارة

في بريطانيا, شباب يحاول يعبر عن احباطه بالتخريب و في تونس شباب يحاول يوصل صوته بشكل سلمي و تطلعاته فيواجه القمع


في اسرائيل تشوف الجيش و الشرطة تتعامل بيد من حديد مع الفلسطينيين في حين انها تعامل الاسرائليين في احتجاجاتهم الأخيرة باللين, و في تونس شنوا يصير؟



في بريطانيا وقت يتم اعتقال شخص هل يتم اشباعه ضربا بعد ما تم تصفيده؟ هل يتتم مفاحشته؟


أما في تونس فحدث ولا حرج .....العقلية في الوزارة ما تبدلتش, و الان ثما ردت فعل ماش توقع على اللي صار....لانه وقت تمنع اي فرصة باش الشباب يعبر على رايه بكل حرية, و تقمع المظاهرة السلمية, فلا تستغرب ان يكون الرد بالعنف 




حربش فان التحربيش هو الحلّ

وجعك راسك؟ و تحب تتفرهد؟ الحل ساهل برشا, الحربوشة هي الحل ... اي نعم, انها الحل, الحل لكل مشكلة, من الصغرة و نحنا نتعلمو, ان الحرابش تحل مشكلة وجيعة الراس, لكن لازم تعرف اناهي الحربوشة المناسبة, لانه لكل داء دواء معين, و هنا لازم التأكيد على عبارة معين, موش كل حربوشة تنحي وجيعة الراس و الا تنحي القلق ...الخ الخ الخ

ولعد أكبر حربوشة كانت الى وقت قريب معروفة و مشهود لها بالكفائة هي الحربوشة الي تشتش, و في رواية اخرى :
Efferalgan 

و لتجهيزها لازم تجيب الحربوشة اللي اما تكون في عبوة تحتوي مجموعة كاملة و الا تلقها منفردة






 المهم تجب الحرابش و معها كأس من الماء و يفضل يكون معدني باش تنهضم بسهولة


تأخذ الحربوشة في مهل و بعدين تحطها في الكأس الممتلئة ماء



 و تسنها لين تكمل عملية الذوبان في هدوء لا يعكرها الا وجيعة الرأس

 



بعدها, تسمي بسم الله و تشرب و ان شاء الله لاباس

لكن اعلم رعاك الله ان حسب البلاد اللي انت فيها فان الحرابش تختلف اسمائها, لذلك لازم تاخذ هذا في الحسبان, وفي تونس حفظها الله, عنا برشا أنواع من الحرابش, و أقوها على الاطلاق, النوع اللي يخلي 11 مليون تونسي ينسى همومه و يركز معاك, نوع قاعد يتعطى فيه الشعب من سنين عديدة ... اما اقوى نوع من غير منازع هو حرابش سيادة الوزير الأول , الباجي قائد السبسي أدامه الله ذخرا للوطن, اي نعم, هو كبرينا, و زميمنا, و اللي لازم نسمعو كلمته, و تبارك الله عليه, يديه مباركة, الحربوشة اللي يعطيها للشعب ما ثماش شكون يجيبه فيها

في البداية, أطل علينا عبر نسمة في حوار شيق و طغى عليه النصح حين و النقد حين أخر أما أهم حاجة قالها فهي في القنزوعي اللي قال فيه انه لازم نجيبوه و نطلعو منه الزيت

و الى الان ما شفنا لا زيت و ما رينا كان الحديث.... تي حتى القناصة ردهم اشاعة, ويزيد يوصي الشعب , اللي يقلى قناص يجيبهولنا كان ما طلعوش من اللي يحموا  في موكب سيادته

 


 و زاد غرق البلاد في الديون و اللي ما عملوش زعبع أطال الله في عمره و زاد الله في مرضه, عمله هو و بعدين يجي و يقللنا مثماش ديون, و برا يا زمان و اجا يا زمان, وعمك الباجي رعاه الله طلع معلم, كيف لا وهو أستاذ زعبع, اللي ركب علينا 23 عام, وزاد ركب معاه المادم و النساب و القراب

 حتى العقربي ركبت و استفعلت في الشعب, أما أقوى حاجة هي الحربوشة متع 14 جانفي, اللي جات بعد ما بدأ الشعب ينادي بتطهير القضاء و محاسبة المسئولين على هروب سيدة العقربي



سيدة العقربي اللي كانت متملقة تونس الاولى اللي طيحت على برهان و شلته في التلحيس لدرجة انها عملت شبكة للدعارة كانت تختص في تطييح المعارضين و اشباع رغبة المقربين و الوزراء المعتمدين لدى زعبع, أما الله اعلم اذا كان زعبع يستهلك معاهم و الا كان مجرد مراقب من بعيد ... و الا بالكشي ثما شكون توا في حكومة السبسي غارق في بحر اللذات و ثما ما قد يكشف انه من رواد دار البغاء السري اللي تديرها السيدة الفاضلة  والا كيفاش تخرج منها كيف الشعرة من العجينة؟ و زعمة السبسي منهم و الا معادش فيه الجهيد؟

ايه, توا فين وصلنا في تطهير القضاء من القضاة الفاسدين؟ وين وصلنا في تطهير الداخلية؟ و ين وصلنا في محاسبة الحشرات اللي امتصت ميزانية الدولة؟ و الا مجرد مجموعة ال30 متع المطار و السرياطي هي اللي ماش تهز الحمل الكل؟ و الباقي يطلع منها نضيف ؟
 


 ايا تعرف كيفاش, هات حربوشة, وسيب علينا من القضاء, و القضاة, يطلعوش عندهم دوسيات تورط اللي في السلطة و يطلع حاميها حراميها و رد بالك لا تقول القضاء فاسد و الا يولي مس في هبة السلطة القضائية, و تعرف كيفاش, خلينا نقول وان القضاء هي الحاجة الوحيدة اللي ما مسهاش زعبع, و ان القضاة الكل اطهر من الملائكة, حتى كان شفت شكون في حومتك متورط في قضية قتل و تشوفه يحوس لبرا بعد ما وكل قاضي التحقيق بعض الباكوات, و ما يهمش اذا واحد أخر متورط في ترويج مخدرات زادة, شنية المشكلة؟ اللي قتل يخرج و اللي يروج في حرابش كيفه كيف السبسي يشد الحبس؟ ملا وقتها لازم السبسي يشد معاه

حربش يا شعب, حربش باش تنسا همومك, حربش يا شعب ياللي تشوف السراق و الفاسدين في المناصب متعهم و انت تتفرج من بعيد,حربش يا شعب و انسى همومك, و كبش في سهرية و انسى دم ولد بلادك, حربش فان التحربيش هو الحلّ


بسم الله الرحمان الرحيم

الى سيادة مدير الأمن تحية و بعد,

لقد راعني أسلوبك في الحوار الذي قمت به بعد أحداث القصبة, فلقد حسبت العقلية الأمنية تغيرت لكنك ازددت تشنجا و ازداد خطابك راديكالية, حتى أني ارتبت في أمري و سألت نفسي هل هذا مسئول يقول عن نفسه أنه ينادي بعقلية أمنية ما بعد الثورة أم أنه يحاول أن يستخدم لغة لي الذراع؟ لقد ازدادت حيرتي حين رأيت كيف كنت تضرب بحديث وزير الداخلية عرض الحائط, وتتجاهل وعده في عدم التصدي للمظاهرة السلمية, لكن يبدو أنك نسيت أنه لولا هذه الثورة التي استغللتها كعديد زملائك ما كان لك أن تنصب مديرا للأمن, لقد  كانت نعمة عليك , لكنك أردت أن تجعها نقمة علينا


يقدم المتظاهرون لرجال الأمن الورد فتردون بالضرب بالهراوات و الغاز المسيل للدموع, تطلب النقابة أعوان الامن بالتزام الحياد, فيستجيب عون فيكون التوقيف عقوبته, يسألكم صحافي عن سبب أسلوبكم الخشن و عنفكم المفرط, فيكون العزل نصيبه ... ترى مالذي سيكون نصيبي بعد أن كتبت هذه الكلمات؟؟


 لكن اعلم, انك لست الا موظف في خدمة الشعب لا جلاد تسومه شر العذاب, اعلم أن منصبك يحتم عليك احترام مخاطبك وان لا تغتر بما أنت عليه, و لقد كان من الأولى لك أن تحترم نفسك و تحترم من كان يحاورك لكنك  أخذتك العزّة بالإثم, فعدت الى سياستك القديمة في القمع و تكميم الأفواه


سيادة مدير الأمن, ارحل, ارحل فان سيدك قد رحل, و ان هذا الشعب لم يقم بثورة لتمسك أنت و أمثالك و من يعتنق عقيدتك الأمنية بمقاليد البلاد و تصبح رقيب على العباد, حتى صار اسمك مرادف لاسم عمار 404 الذي لم يبلغ بالرغم من كل ما فعد منزلتك ...


اني اليوم أساند عماد بربورة الذي وجد نفسه معاقبا لأنه أحرج مدير أمننا المبجل, الذي  لا يحب أن يرينا الا ما يرى, و الذي جعل السجون للشباب مأوى, فأمن الله الذي يعاني من مشاكل صحية تم تجنيده قسرا ... اني اليوم أساند حرية التعبير و الصحافة و الإعلام و التدوين و كل من يفتح فاه ليقول رأيه, فتبا لكل جلاد و تبا لكل مسئول طغى و أراد أن يخضعنا


في الختام, كلمتي حرة, وهذا حقي الذي لا يساوم, واذا حرية الاعلام و التعبير ستمس فلا خير في شعب يقول عن نفسه أنه  قد قام بثورة




عماد بربورة


لمساندة حرية التعبير يمكنكم الالتحاق بالجروب التالي :





http://on.fb.me/opF4nz


السلام عليكم 

دولة قانون الغاب

أمس 15 جويلية, كان ثما دعوة للتظاهر السلمي ... و الي تلبيلي مطالبي و ان كانت بشكل جزئي ... لكن ما راعني الا أن المتظاهرين السلميين يتم التصدي ليهم بكل همجية ... الحكاية بدات من قبل ما يبدا الوقت الفعلي اللي تم اعلانه للاعتصام







تحول المسجد في البداية الى ملجئ لكنه في النهاية تحول الى أشبه بالكمين, حيث سرعان ما تم اقتحامه و اعتقال من فيه وهذه شهادة من شمس أف أم على اللي صار






الرابط:


https://www.facebook.com/video/video.php?v=1966922765271


تم التعرض  بالعنف المادي و المعنوي للموجودين, رغم أنه قبل هذا الكل من الصباح, ما تتعدى الا فردى و حصل برشا استفزاز من الأمن: شتم و ضرب بالكف و دزان للمتعدين


بدات المواجهة و شفنا الكر و الفر اللي صار, و اللي أنتها باعتقال قرابة 200 شخص, مع العلم أن عدد قوات الأمن فاق عدد المتظاهرين ... بعد كل هذا يبدأ الحصاد, لكن هو حصاد مرّ, لأن النتجة كانت اعتداء بالعنف الشديد على العديد من المتظاهرين, رجال و نساء








 و كذلك برشا سكوت على اللي صار, هذا علاش ما شفناش نفس التنديد اللي صار قبل في أحداث أفريكا و غيرها, اليومة ثما شكون يبرر العنف و يقول يستالهو , بل وصلت الدنائة عند البعض لدرجة أنهم عملو صفحة





و اللي فيها قالو "لا للنهضة" و نعم للعنف البوليسي اللي وصل حد اعتقال عون الأمن محرز حرزلي اللي قال: "يحيا الشعب " ... فتم اعتقاله و تحويله لمجلس التأديب, لأنه عيب أن تقول يحيا الشعب



 لأن فيها مس من وزراة الشذوذ و اللواط, و كل من يحل فمه أو يحاول أن يقطع مع العقلية القديمة للأجهزة البوليسية اللي تحب تكرس مبدأ تسمع و تسكر فمك, و اللي ما يفهمش المنطق هذا المتراك تستنى فيه, و أكبر دليل هو مدير الأمن توفيق الديماسي





 اللي كان قبل في التفقدية العليا و اليوم بعد ما ترقى جاي يحكي بلوغة حرشة, متع واحد موش فاهم قدره, و يحبك تسكر فمك, والا تجرب القعدة على المتراك كان لزم و اللي ميزال يحكي بلوغة متع 20 عام لتالي لدرجة أنه يعتبر أن وزير الداخلية ما عنده ما يحل فمه معاه... موش غريب عليه و على أمثاله في حين أن سمير الفرياني يقبع في غياهب الجب, لأنه تجرأ و قال كلمة حقّ


الديمايس اللي يحكي بكل وقاحة جاي يهدد وجب تذكيره أنه لولى ثورة 14 جانفي لما رأى الترقية اللي خلاته مدير أمن, لكن الانتهازيين اللي كيفه جاي يحب يفرض سياسة الأمر الواقع, لانه من أولاد برقيبة, عذرا نقصد من أولاد ليلى اللي وصلو حد تزييف الوقائع, و اصابتهم بسلس من البيانات الرديئة


تبعا لبلاغ يوم أمس 15 جويلية 2011 والمتعلق بتدخل قوات الأمن الداخلي لتفريق مجموعة من المشاغبين قاموا بقذف حجارة محاولين الاشتباك مع متساكني وتجار الأسواق المدينة العتيقة ودخول مجموعة منهم تفوق المائة إلى الجامع المحاذي لوزارة الدفاع الوطني حوالي الساعة 15.00، فإنّ هذه المجموعة المشاغبة قامت بالاعتداء على تجهيزات دور العبادة المذكور وقذفت قوات ألأمن الداخلي بكلّ ما طالته أيديهم من أحذية خشبية (قبقاب) وأحذية بلاستيكية وحجارة تيمّم وهي جميعها خاصّة بالمصلين. كما قاموا بتكسير الحنفيات والأبواب الخشبية وتقليع أرضية المسجد وقذفوا بها أعوان الأمن وتدنيس باحته ببقايا المشروبات الكحولية. هذا وقامت ثلة من رؤساء الأحزاب والجمعيات الحقوقية للمبادرة بإقناعهم بمغادرة الجامع دون أن يتعرّض لهم أحد، حيث رفضوا بل أنهم قاموا بشتم بعض رموز المذكورة. إثر ذلك حضر السيد مساعد وكيل الجمهورية وعاين هذه المجموعة وآثار اعتداءها على الجامع وقد طلب منهم المغادرة ومكّنهم من مهلة زمنية لذلك وبداية من الساعة الثامنة ليلا عاودت المجموعة التهجم وإثارة الشغب وقذف بعض أشياء صلبة مجددا فتم إنذارهم حسب ما يمليه القانون بضرورة التفرّق فلم يمتثلوا ممّا استوجب التدخل لتفريقهم وذلك حفاظا على الأرواح والممتلكات العامة والخاصة. كما تمّ تسجيل أضرار بدنية مختلفة لعدد 18 عونا.


اليوم كل واحد يبرر العنف المفرط للأمن و يتشمت فيهم و يوصل حد التشفي و المطالبة بمزيد من التنكيل, لازم يتذكر أنه نفس اللي يقوم بيه صار في عهد بن علي, و ميزلت نتذكر في كل مظاهرة كيفاش تسمع السبان, و تسمع شكون يقول : كمشة بيوعة و يسبو كل من يحل فمه

و لازم يعرفو زادة, أنه اليوم المتظاهرين في القصبة 3 تم تعنيفهم و غدوة يكونو هما, اذا فرضنا أنه عندهم الحد الأدنى من الشجاعة باش يسيب المكيف اللي في الدار و يهبط للشارع في مظاهرة ذات مطالب سياسية , و كذلك أن التريخ لا يرحم, و موش ماش ينسى حتى حد كيفاش كان الفرخ هذا يخدم بوليس أنترنات و كيفاش هز القفة لكن تهرات يديه


في الختام, بوادر السياسة البرقيبية بانت عبر تحويل 20 من المعتقلين الى التجنيد مع العلم أن فيهم شكون من الطلبة, و هذا نفس اللي صار في السابق و رجيم معتوق أكبر شاهد, و اذا اليوم تم اعتقال مدونين, ناشطين على الانترنات, و متظاهرين سلميين, و تعنيفهم من غير ما يخاف العون الي اعتدى بالضرب انه يحاسب فانه غدوة نجم نكون أني أو انت, واذا اليوم ثما شكون ماش يلتزم الصمت و ما يحلش فمه لأنه يخلف مع المعتقلين في الانتماء الفكري أو السياسي, فانه غدوة موش ماش يلقى شكون يدافع عليه, وقت يرجعنا النظام البوليسي اللي لم يزل من تونس بمزيد من الهمجية, قصد اخراس الأفواه و فرض حكم البوليس لتونس و أنه و ان تمت الاطاحة ببن علي فانه لن يكون قصد تعويضة بدكتاتورية جديدة أو بــ"حكومة ذلّ"





التظاهر السلمي حق دستوري لا يقبل النقاش أو المزايدة, و للحديث بقية في مظاهرة اليوم على الساعة 16:30 بساحة محمد علي

TUNISIA

TUNISIA

من أجل تدوين نظيف

!هذا أنا

Ma photo
حروف مبعثرة...برشا حديث وحكيات... كيف كل الناس

هذا أنا

بلوغ مثل اي بلوغ أخر.. موش لازم تقلق برشى من هذه الناحية ..... الايام كفيلة باش تعطيك الصورة الادق على المحتوى

أقوال تروقني

أنا من أشد المؤمنين بالحظ، وقد لاحظت أن حظي يزداد كلما زاد عملي

توماس جفرسون
الرئيس الثالث للولايات المتحدة الأمريكية

ضيوفنا الكرام