Hadhaa Ana!

... برشا حديث و حكيات


حاجة عادية ... حاجة عادية


وقت تسافر, تشوف برشا حوايج جديدة, في أمستردام على سبيل المثال, وقت تكون تحوس تصادف محلات عندها فترينة, في الفترينة تلقى سلعة , من بعيد تعيطلك, تضحكلك و تقلك تحبش؟



في الواقع في الفترينات هذه, تلقى ثما مومسات, في المحلات المجودة في قلب بعض العواصم الغربية تستغل الأسلوب هذا للاغراء, و نفس الشيء تقريبا موجود في بلجيكا ... لكن الحمد لله انك وقت ترجع لبلادك تلقاك مرتاح ان المنظر هذا ما تشوفوش



يتعدى الوقت و يجي رمضان ... و يبدأ شهر العبادة أو هكذا كان يسمى الى عهد قريب , لكن في القرن الحادي و العشرين, يتحول الى شهر الفرجة و المسلسلات, كل قناة تعرف انه من أكثر المواسم مردودية ... كل واحد يعرف أش يسعده, تحل التلفزة الوطنية , وقت تقول التلفزة الوطنية فانك تحكي على قناة يصرف عليها دافعُ الضرائب, حك جيابك


تقعد قدام تونس رقعة و تبدأ تتفرج مع العائلة, و تسب روحك على العملة


و بعد ما تحلها تشوف الفظائع, تي أش فيها؟ بنية تجي و يتم التعريف بيها كبائعة هواء, أش فيها؟ ماعندهاش الحق تمارس التجارة؟ توّا البنية عملت العيب؟ تي هوّا سامي الفهري يقول نورمال, أش بيها؟ موش نورمال؟


كيف البنية الحلوة اللي يجيبوها زوز أولاد للبرتمان باش يعديو سهرة في طاعة الله, أش فيها؟ تي خوات, مبيناتهم شيء, نيتهم صافية, أش فيها؟


و الا اذا راجل يعمل صحبة على مرته, أش فيها؟ عيب؟ حرام؟ و الا , سيب علينا من لوغة قال الله و قال الرسول, على خاطر شيوخ الفضائيات التونسية , ميحبوش يخوضو في الحكياة, أش لازم يتحككو, لان الحديث متع قال الله تعالى , ما يمشي كان مع العامة, رغم أن ربي ما يميزش بين العامة و الخاصة, و بين الغني و الفقير, أما هل يفسد النفاق الصيام؟



تو انت تحل التلفزة , و تشوف عينة راقية من الكادحات في صمت, بائعة أكسيجان, تتعطر, و تتجمل, و تتزين, و تحب تفتنك بحسنها, أش فيها؟ موش نورمال؟ عادي, تي خليك اسبري , شبيك متعصب؟ و متطرف و ما الى ذلك من اللوغة الزبلة متعه الشلايك اللي غزات التلفزة الوطنية, حلوة اللقطة ان فلوسي اللي ندفع فيها تمشي في تشجيع العهر الاعلامي التونسي... كيف كل مواطن يخلص في الفاتورة متع الستاج



توا بالأمس وقت قال ثقيل الظل , العبدلي عدة نكات سخيفة و جارحة, قالو نورمال , و اليوم نفس الشعار : نورمال



جماعة النورمال هاذم, بالمجد يحكيو؟ توا عادي باش شخص يصوحب على مرته و يمارس مع عشيقته الجنس؟ ملا في عائلاتهم نورمال؟ بوهم مصوحب؟ أمهم مصوحبة؟ أخته مصوحبة على راجلها؟ و الا ما يرضاوش؟ و عادي؟


هذا الكل في كفة, و مشهد مضاجعة على الملأ في كفة, قول علينا في فيلم بورنو, قال شنوّا عادي



عادي برشا, انك تشوف شكون موش متربي, و عادي برشا انك تشوف شكون عامل فيها قافز و عادي برشا انك تشوف شكون يحب يخلي الناس تغزله, و من هذا المنطلق يعمل المستحيل باش الناس تعرفه, ثما اللي يعمل العجب, و ثما اللي يبيع, و يقبل باش يطيح و يشلح, منيش نستهزئ , أما نقدر في دور ممثلة شابة قامت في سبيل الفنّ بلعب دور مومس, تي شبيها المومس , موش محترمة؟ تو اللي يخدم و يتعب, فيها عيب؟ تي المومس تخلص في الأداء للدولة, و تلوم عليها؟ تي المومس اللي تباع و تشترى ... و الا سيب علينا من تباع و تشترى و نعتبروها من بين اللي يقدم في خدمات للمجتمع و للشعب و الشباب


توّا للدرجة هذه يوصل العبث؟ لمحاولة ان الثقافة متهنا تتحول الى خرقة بالية, قال شنوّا الحداثة, و اعلام حرّ؟ الحرية هذه ما توجد الا في ثقافة الجزء الأسفل من الحزام؟ الى درجة أنك تشوف محاولة تمرير للأخلاق المنحطة في قناة وطنية و معها لوغة عادي, و هذا صحيح و موجود, ممكن في ديارهم , منلومش عليهم, اذا يوصفو حالهم, أما موش في ديار التونسة الكلّ, لأن المومسات و أشباه الرجال اللي داهم في أعضائهم الذكرية , ما هم الا فئة شاذة ... جمعية أحباء السراول الطايحة

الفئة هذه اللي تتصور انها الصورة الطبيعية, و انها الصورة المثلى و الصورة الصحيحة لما يجب أن يكون عليه المجتمع التونسي , تتصور أنها على الصراط المستقيم, تتصور انها الفئة اللي تمشي على الحقّ , الشيء اللي يفسر وجود رؤس أموال تونسية مستثمرة في قنوات اباحية موجهة للعالم العربي و لاوربا, فالمهم هو المال المتدفق الى جيوبهم ... ما يغركش لوغة الحرية و لوغة ان اللي تشوف فيه في المسلسل موش غريب , لكن في الوقاع هذا الكل يدخل في البحث عن الأموال و لو كلف الأمر ان يغمر المجتمع بالرذيلة


بعد ما يجي في كل فترة مسلسل و الا برنامج قذر , ثما أصوات عفنة تتخبى, أصوات أشباه المثقفين و العلماء التافهين, أصوات حقيرة, لا تتردد في نقد زيارة القرضاوي قال شنوا انه ماش يمس المكاسب و يهدد المجتمع و في نفس الوقت أصابها الخرس وقت جات قدام مسلسل عفن, أصوات لا تتردد في محاولة اجتثاث تونس من محيطها و المس بثقافتها , زمرة قذرة, تتمحور أقصى تحدي يحبو يرفعوه في بناء مركب ثقافي شبيه بعبد الله قشّ في كل مدينة و قرية و دوار في تونس و الحاقه ببار, و تخصيص كعبة بيرا لكل مواطن, و في نفس الوقت تجد شيوخ الفضيلة و الخير اللي يختارو السكوت في مواضيع كيف هذه, و يؤثر تجنب طرح الموضوع, و الاكتفاء بوعض العامة و ارشادهم في كيفية الوضوء و حكم انك تشم التابل و الكروية وقت تمشي لحنوت الطحان , ملاّ وينك؟ تحبه يتحكك على الزرب؟

12 commentaires:

موافق اللي قاعد يبث في تونس شبعة من حيث طريقة الطرح موش مقبول. خاصةً انو من المفروض انو يكون موجه للعايلة وفي شهر عبادة بالنسبة للمسلمين اللي يمثلو الأغلبية في تونس ... لكن من حيث المضمون هذا اللي قاعد صاير في البلاد للأسف ...

وزيد هاذي إستراتجية النظام ... "سيب السياسة وتسيب في العريض كما تحب" ... في محاولة للتنوم وتطبيقاً لنظرية "الشعب يحب اللعب"

المطلوب هو البديل ...

what you're talking about is 100% real... and Mr.Youssef (the one who commented before me) is so wrong when he said that "... that's what's really happening in the country unfortunatly"!!! because after all, any one who commits fornication in Tunisia does not want that to happen with his sister or his mother!!! so in the end, these scambags who talk like "heyyy it's normal!!!" are liars and they're just serving the Zionist agenda of screwing ethiks in the Islamic countrys...
and by the way, that company "Endemol" is owned and runned bye Zionists, you can see that by the symbole of the company, it is actually the symbole of "The One Eye" that desinges the Antichrist (Al Massih Addajjal)...

تي بلاد مشات للهاوية وفات فيها الفوت وميش باش تقوملها قايمة حتّى بعد 100 سنة...

امخاخ الشبيبة والكهول والشيوخ تغسلت ومازالت تغسل في عمليّة شعواء منذ أكثر من 50 سنة....

واللي ينطق يوقول علاش ياكل على راسوا من هالحثالة الظلامية التي تنعته بالظلامي الرجعي المتخلّف الخوانجي الوهابي الإرهابي.... والا يمشي يتضيّف عند خالتوا بما أنوا يهدّد مشروع عمّوا اللي يتم بإشراف من الجيران في الضفّة الأخرى من المتوسّط...

هذاكة اش خلّى أي واحد عندوا مخّ والا طرف عقل يهجّ مالبلاد واللي فيها بصفة شرعيّة أو غير شرعيّة...

بلحق شي يعمل العار ! ملاحظة يوسف صحيحة : الشي هذا موجود عنا لل أسف فل مجتمع و لكن إل vulgarisation متع الشي هذا فل تلفزة التونسية ؛ في رمضان en plus وقتلي الناس الكل متلمين et en famille مش معقول
malheureusement ما نعرفش إذا كان فما حل بش الأمور تتصالح على خاطر ‎c'est une véritable main mise عال تلفزة !

@Youssef
الفكرة هذه موش جديدة, في روما القديمة كان القياصرة و الحكام الرومان, ينومو شعبهم بالاحتفلات و اقامة المبريات اللي كانو يجيبو فيها المصارعين من مختلف البلدان, و المستعمرات الخاضعة لهم, الأهم أن الشعب يهتف بالولاء للحاكم, و على نفس المنوال اليوم قاعدين نمشيو, المهم تساند و تصقف و تهتف ... ما تبدلش الهدف, لان الأسلوب تغير

ولوغة الشعب يحب اللعب, هو تعبير واضح على النقطة اللي يحبو يستغلوها, مجرد العبث بالشعب و استعلال ساعة الفسحة اللي يقوم بيها للترويح على نفسه قصد اخضاعه
دمت بودّ صديقي, و شاهية طيبة

@Anonyme 1

ضيفي الكريم, في الواقع, ماعدش نجم نشوف خطر أكبر من اللي ينتج و يمول في المشاريع هذه, اذا كانت الخطر الصهيوني اللي تحكي عليه متمثل في بعض اللي يحالو اختراق المتمعات العربية فان خطر اللي منتجين للبرامج التافهة هذه يتمحور في كونه يستغل في وجوده في قلب المجتمع, اليوم المسلسلات العفنة هذه أشد خطر من اللي ذكرتهم, فهم يعملون بالانابة
دمت بودّ صديقي, و شاهية طيبة

@Anonyme 2
النهضة الحقيقية لأي مجتمع لا تتم الا بوجود الارادة السياسية, و مهما نعملو, مناش ماش نوصلو في نهار نتقدمو بوجود العبث هذا, و الخزعبلات متع المنحطين اللي يعديو فيه في التلفزة
دمت بودّ صديقي, و شاهية طيبة

@Houssem
شوف حسام, اذا في السهرة تحط قناة ألمانية أو فرنسية باش تتفرج عليها في بلاصة انك تتفرج على تونس رقعة فهو أرحم و أحفظ لماء وجهك قدام اللي يتفرجو معاك

دمت بودّ صديقي, و شاهية طيبة

أسألكم بالله أن تزيلوا كلمات : عادي - نورمال وموش نورمال من قواميسكم حفاظاً على صحتكم النفسية والعقلية ومخافةً من الله

@Anonyme3
بربي قريت الارتيكل بشكل جيّد؟

خطأ في مكان التعليق
http://hadaa-ana.blogspot.com/2010/08/blog-post_18.html
______________________________
Anonyme a dit… 18 août 2010 12:44
الله الله عليك يا خويا ... ايه ايه زرقلهم خللي بالكشي يفيقوا على رواحهم... ما عادش واحد ينجم يتفرج ع التلفزة مع خوه الصغير و أمو ولا شنوة ؟؟
أما شتحبني نقلك .. يحيا التطور و أدام الله لنا حرياتنا الشخصية ما دمنا تحت ظل الرذيلة و الفسق و الأنظمة الملكية .. آمين يا رب العالمين

خوك في العروبة و الاسلام و الانسانية و قبل كل شي في الفايسبوك

@Anonyme4

صديقي, القناة الواطية متع تونس 7, اللي داخلة علينا بقوة معادش تتقرب, تي كان تحل اي قناة غربية يكون أهون, و موش حكاية تطور أو حريات, أما القلوب المريضة اللي تجري وراء المادة و الفلوس سبب هذا البلاء

houta alik klemek à 100% shih
9oulehom yetfarjou fi beb el hara 5ir
telga el 5ir

مقال رائع ومحزن في نفس الوقت

الله المستعان

@Anonyme 5
كل واحد حرّ علاش يحب يتفرج أما اللي يبث و يكون موجه للجمهو التونسي موش مسيب باش يجي شكون كيف الفهري الباحث عن المال باش يعوث فيه فسادا

شكرا على المرور صديقي, و شاهية طيبة

@Anonyme6

شكرا صديقي, أسعدني مرورك, و في أمان الله
شاهية طيبة

Enregistrer un commentaire

بسبب بعض المشاغل و القراية منّتجمش نتابع المدونة بشكل دوري, متقلقش اذا التعليق خذا وقت باش يتم ادراجه و الكلام الزايد يجعل ادراج تعليق صعيب شوية, نقص منه و تفضل قول اللي تحب , بالتوفيق

TUNISIA

TUNISIA

من أجل تدوين نظيف

!هذا أنا

Ma photo
حروف مبعثرة...برشا حديث وحكيات... كيف كل الناس

هذا أنا

بلوغ مثل اي بلوغ أخر.. موش لازم تقلق برشى من هذه الناحية ..... الايام كفيلة باش تعطيك الصورة الادق على المحتوى

أقوال تروقني

أنا من أشد المؤمنين بالحظ، وقد لاحظت أن حظي يزداد كلما زاد عملي

توماس جفرسون
الرئيس الثالث للولايات المتحدة الأمريكية

ضيوفنا الكرام