Hadhaa Ana!

... برشا حديث و حكيات


بنت حلال



الخبزة صعيبة … و الأصعب هو انك توصل بعد القراية التي تستمر أكثر من 19 عام على الأقل من الابتدائي الى التعليم العالي , الى خدمة مرموقة , تمكنك من انك تعمل شهرية و دار و عائلة و تعيش في مستوى أحسن من غيرك الي اختار انه ينقطع عن القراية في مرحلة مبكرة... لانك تحب تعيش بقدرك ومتمدش يدّك للعباد


و بقدر ما يكون عندك شهايد , تقول انك ماش تسلكها أكثر من غيرك , و يوم من الايام تكتشف ان هذا , ما هو الا حلم , لانك ماش تشوف شكون مقراش للسنة السادسة ابتدائي و عنده من العمرات و السيرات الفارهة ما يجعلك تقول بانه وريث خزائن سليمان


و رغم هذا يجي في بوسطة أو في بانكة و يقلك "بربي عمرّلي الشاك" … لان الدنيا زهّرات , و كل واخد و شنّوا يحصل منها … لهذا السبب , فما شكون يهاجر , الى دول مختلفة






منها الي يهاجر الى أوربا و يربح كونها قريبة , ساعتين في الطّيارة و يكن بين أحبابه و الأهم انها متطلبش برشا فلوس , و ثما الي يهاجر الى أمريكا أوكندا , و هم من الي عندهم الحد الادني على الاقل باش ينجمو يصرفو , العيشة غالية … و ثما شكون يشوف انه في ذهابه الى الخليج العربي حلّ وسط , لانه ماش يكون في مجتمع عربي , مهما ثما فرق في الثقافة , موش ماش يكون بعدي عن الموجود في تونس , الشيء الي ماش يخلي الاندماج سهل



و منهم شاب تونسي , مشاء الى الخليج , للعمل بعد أن أكمل تحصيله الجامعي , يبدأ الخدمة في شريكة خاصة , و مع اجتهاده في الخدمة تمكن انه يتحصل على شهرية جيدة , و خلاته يفكر في الاستقرار … و بدأ مشوار البحث عن بنت حلال



يحب بنت بلاده , بنت بلاده ممكن تفهمه و في نفس الوقت تخليه يرجع الى أرض الوطن و مهما يبعد , يكون عنده الحافز للرجوع


بنت حلال , حاجة صعيبة


موش الناس الكل كيف كيف , في الاخلاق و التربية , و كيف ما الناس الكل , يحاول انه يكون مع شخص الي ينجم يصونه وقت يكون غايبو في نفس الوقت ممكن يربي صغاره


محبش انه يغامر , و اختار انه يتزوج بنت شخص يعرفه , و كان هذاالشخص يعمل في نفس البلاد , الي يخدم فيها هذا الشاب , بو البنية , راجل متربي , و عندو أخلاق عالية و "يخاف ربي في خدمته" ,موش كيف برشا من الي معاهم ,


بعد ما سي الشباب , كلم بو الطفّلة و تفاهم معاه , و بعد ما تم الاتفاق , بدأ الاعداد للزواج , و الاكثر من هذا , هو ان الشاب ما يعرفش البنية , يعني حكم علاها عن طريق بوها … و قال , أكيد ما تكون كان كيف بوها


منعرفش , كيفاش ممكن نوصف شعوري و قت سمعت بالحكاية , لاني نعرف الطفلة هذه من مدة طويلة , ممكن من الي كنت في المدرسة الاعدادية... نعرفها عن قرب , لاني كنت ديما نشوفها


نشوف , شلتها , و نشوف الجو متاعها


قعدات متعجبش , و أفعال , تقعد باهت فيها ...مهياش من جماعة الأوكسيجين , أما منيش عارف كيفاش ممكن نوصفها


منعرفش , كيفاش نوصف , طفلة نشوفها كل مرة مع واحد يقوم مرة بمداعبة و مرة بملامسة غير بريئة لجسدها


كيفاش ممكن نوصف , بنّية وقت نشوفها مرة ماشية على أطراف المدينة مع شلة من الشباب , الى ضيعة فيها مسكن , و يكونو الشباب المرافقين من أولاد حومتك و تعرف انهم من البالحثين عن اللاذات


كيفاش , ممكن توصف طفلة , وتقول هذه ماش تربي صغار و تصنع جيل , وقت تشوفها مرة على موتور , مع شاب الشيء الي يخلي قهوة كاملة تغير وضعية الكراسي باش تنجم تستمتع بالمشهد


خلاصة الأمر , ان السيد الكريم , تغش في البيعة , و الاختيار متاعو موش في محله... الاختيار سيئ للغاية, لان البنيّة ضايعة



نعرف أكثر من عائلة في المحيط , بوهم في الخارج , و نعرف انه الأم عوضت غياب الاب , وان كان بشكل نسبي , لكن الشيء الاكيد انها جنبت أولادها الضياع


لكن في الحالة هذا , غياب الأب و عدم قيام الام بواجبها على خير وجه , خلات بنتها تضيع


الأخ الكريم , عرس في الصيف , و منعرفش أش صار معاه



اما الدنيّا زهرات …. كان الله في عونه

4 commentaires:

في عصرنا هذا معادش معرفة الأب أو الأم تتسمى معطيات كافية بش الواحد ياخو مرا ...يلزم فما تواصل مابيناتهم الاثنين و توا كل شئ متوفر أنترنيت، تلفون.... يلزم فما تناغم في كل شئ تقريبا ، منقولش تشابه و لكن تناغم يعني يكونو مختلفين و لكن قابلين اختلافات بعضهم و بالطبع يلزم يكون الكثير من المعطيات الأخرى ... ربي يعينو السيد هذا و ربي يعينها هي زادة

ربي يحفظهم , و يستر عليهم .. أسلوب الاختيار موش صحيح , و الأكثر ان ثما زادة من البنات الي تتغش بالشخص الي يتقدملها , الكل يحكم بالمحيط : اما أخلاق الأهل , أو المستوى المعيشي , الا ما رحم ربي

في أمان الله

ملّـــه قطيطس زبلة،آش يطلع منّــــــــــــو ياسيدي
:):):):)
مدونات على كل لون
:):):)
و نقد اجتماعي
:):):)
تلعب انت
؟؟؟؟؟؟

@Anonyme
غالط في الاندريسة صديقي , الشخص اللي يكلم فيك موش نفسه قطّوس الزبلة و ان تقاربت الوجهات

نهارك زين

Enregistrer un commentaire

بسبب بعض المشاغل و القراية منّتجمش نتابع المدونة بشكل دوري, متقلقش اذا التعليق خذا وقت باش يتم ادراجه و الكلام الزايد يجعل ادراج تعليق صعيب شوية, نقص منه و تفضل قول اللي تحب , بالتوفيق

TUNISIA

TUNISIA

من أجل تدوين نظيف

!هذا أنا

Ma photo
حروف مبعثرة...برشا حديث وحكيات... كيف كل الناس

هذا أنا

بلوغ مثل اي بلوغ أخر.. موش لازم تقلق برشى من هذه الناحية ..... الايام كفيلة باش تعطيك الصورة الادق على المحتوى

أقوال تروقني

أنا من أشد المؤمنين بالحظ، وقد لاحظت أن حظي يزداد كلما زاد عملي

توماس جفرسون
الرئيس الثالث للولايات المتحدة الأمريكية

ضيوفنا الكرام