Hadhaa Ana!

... برشا حديث و حكيات


كيف كل يوم , نوقص التليفون ليعلن بداية يوم جديد ... و كيف العادة الستة و نصف هو موعدي مع صباح جديد .. نحضر روحي , و نمشي نقعد نتفرج على البحر شوية قبل ما نمشي نقرأ , مشهد يخلني نجدد نشاطي و يخليني نرتاح برشا


شروق الشمس من الساحل خلف فندق رويال حمامات


أيامي متشابهة , قراية من الساعة الثامنة الى ان ييسر الله نهاية اليوم الدراسي , في بعض الأحيان يكون نهايتو في منتصف اليوم و سعات يكون في مسائه ... بالنسبة لي , مهياش مشكلة كبيرة ميقلقنيش الشي ... ممكن الي قلقني أكثر هو اني ندخل ساعة و تتعدى في ما لا ينفع و لا يكون منه مردود , كيف نهار الخميس … الدرس ممل جداا , و زيد على هذا منقل حرفيا – مفاقش بيه الا البعض - و مفماش عليه اي تعديل … الشيء الي خلاني نرقد في القسم لبعض الدقائق…. نسهر نقرأ و نصبح تاعب و ناقص نوم و نمشي نقرأ و نندم


380088170_02de83a46b

من الصباح للعشية قراية و الاستفادة ممكن متتجاوزش حصتين أو ثلاث .... الساعة الأولى تعدات في الحديث و في اللعب و الي بعدها الاستاذة مش متمكنة من المادة الي تقري فيها , فلم تستطع أن تنال احترام الطلاب و لا اهتمامهم ... هي تقرأ من الأوراق و مفما حد قاعد يسمع : الراقد , و الي يلعب بالتليفون و الي قاعد يتفرج من الشباك و الي قاعد يحكي مع زميله أو زميلته و الي حالل اللاب توب و قاعد يعمل في حاجة , أو يلعب


laptop_work


و كل مرة نجي نسألها , نحس وجها يتبدل ... لان تجربتها معيا مش جد برشا ... لاني نقرأ ببعض الدروس المتوفرة من بعض الجامعات الغربية , و كل مرة نتبع الدروس هذه تجعلني نطرح أسئلة جرات العادة ان الاستاذ – اذا ميكونش متمكن من المادة الي يقدم فيها - ميقدرش يجاوب عليها ..كيف حال الأستاذة هذه ... الله غالب , وليت نحس أني نمثل مشكلة في القسم لبعض الي يقريو فيا ... كان الله في عونهم , الشي الي يخليهم اما يتجالهوني بعد أن يتم التظاهر بانه مركز على سؤال أخر يكون من الدرس و يقدر يجاوب عليه أو يهددني بالطرد من القسم في حالة اعادة الكرة أو في أحسن الأحوال يقول : هذه ماش نشوفوها في المحور أو الجزء كذا و كذا ... و بعدين منشوفوش ريحتها


بعض الأساتذة , يبهرني بتمكنه من الدرس الي يقدم فيه و يجعلني نخدم أكثر المادة الي يقري فيها , و يزيد يحببني في القراية ... و ان كنت نحاول نتخلص من فكرة العاطفة في الدراسة . خاصة مع المواد اللي الأستاذ ميكونش يبذل في مجهود ... لكن الشيء الي يفددني أكثر هو العمل الجماعي , و ما أدراك ما العمل الجماعي


تجربتي مع العمل الجماعي مش جيدة برشا , لاني نكون في النهاية مجبر اما على تمضية الوقت في الشرح للي يخدم معيا في أشياء شفنها في القسم , أو على اني نخدم وحدي و بعدين يقسمو معيا العدد في النهاية, و ان كنت نفضل الحالة الثانية الي تعطيني أكثر مرونة في الخدمة ... جات في العدد الي ماش يتقصم ؟ مش مشكلة , المهم الخدمة تكمل و تكون ممتازة


لكن مرة من المرات , كنت ماش نقدم خدمة صحبة مجموعة من 5 أشخاص - عدد كبير للعمل في فريق – و زيد تم اضافة زوز أخرين للفريق , ليتحول العمل الى كارثة , واحد يجي يقلك مش فاهم و مفماش وقت باش نقعد نفهم فيه , و واحد يجي يقلك فسرلي كل حاجة تعملها و يكون مقراش حتى الدرس و معندوش اي فكرة عليه و نقعد نضرب في روحي و نلعن العمل الجماعي ... يكذب عليك الي يقلك يد وحدة متصقفش , مع الحلات هذه , كثرت اليدين تخلي التقدم في الخدمة و سير المشروع مستحيل ...الشيء الي خلاني نطلب منهم اني نكمل الخدمة مع زميل أخر خدّام . و نهار تقديم المشروع ,ستر ربي و كان التقديم جيد و مشاء كل شيء على أحسن حال ... و كان أحسن عدد من نصيب المجموعة , و تركت و زميلي الخدّام انطباع جيد عند الأستاذ , لكن باقي الفريق حبوا يبهرو الاستاذ و يكونو في الصورة ... و قالو : حتى احنا خدما خدمة أخرى , و موجودة


و تفطن الأستاذ ا ان اللي خدم الخدمة مش الفريق كامل , بل شخصين و الباقين مخدموش ... وزاد طلعهم للصبورة و سألهم أكثر من مرة و منجموش يجاوبو ... و تحول الانبهار الى مهزلة لهم , و في النهاية تنحالهم العدد الجيد و خذاو عدد دون المعدل... كان قعدو ساكتني راهم سلكوها أما جابوها لرواحهم


bad-grades

برا يا زمان و اجا يا زمان و نهار الخميس , على أول ساعة , جاء قعد بحذيا زميل و قعد يخرنن لانه مش راضي بخدمت أحد زملائه في فرق عمل على مشروع


الشيء الي يفددني هو كون الشخص الي يخرنن هو بحد ذاته المشكلة في الوضعية هذه و في بقية الوضعيات ... خلاصة الأمر , مشكلته مشكلة


الله غالب , ديما مش موافق و ديما مش قابل و ديما هو الي يفهم و ديما أمورو في الجبن و البقية ... الله غالب


قعدت مرة نخدم معاه في خدمة و ندمت على العملة اللي عملتها , و الله كدت نظرب روحي بالكف أكثر ن مرة , خدمة متع ساعة شدت معاه ساعتين و نصف أو ثلاث سعات , بسبب اعترضاته و اقترحاته الي مش في مكنها ... كل منقول حاجة , يقول مش موفق , و كل ما يأيدني المعيا في الجروب في فكرة يقولي هذا الي كنت نحكي عليه , و مع هذا يقعد متغشش و مش عاجبو


ساعات تعداو , رزان كثقل الجبال ... أكثر من مرة كنت ماش نهز روحي و نخرج و أكثر من مرة كنت ماش نضرب روحي بالكف و الا نضرب راسي على الحيط من الشيء اللي نقاسي فيه


sad-man-forehead-on-the-wall

المشكلة في الحكاية هي ان الأستاذ هو الي فرض عليا الخدمة في جروب , و من أول ثانية سي زميلي رمى روحو في الجروب , و حشمت اني نتقبلوش فيه ... و ياريتني قلت : لا


كل مرة يجي يحكي معيا و يقلي نحبك تفهم و قتها نعرف اني ماش نعيش دقائق أزمة نفسية , منحبش نسكتو


فنجرحو , و منحبش تقعد نسمع فيه فيمرضني ... اش نعمل ؟


و الله شيء , يمرج , هو مش متمكن من الي يقرأ فيه و يجي يحب يفسرلي , منيش قاري النقص في العباد , أما وقت تلقى شخص يقرأ على سبيل المثال في تخصص فزياء و يسميلك "البشار " - , صحفة ... اش تقول ؟ و الا شخص يقرأ في اي تخصص و مش ملم بأبجديات التخصص و يجي يناقش و يجادل و يقلك عندي فكرة


و الله الحوايج هذه تكرهني في العمل الجماعي , و في العمل في مجموعات .. ميقلقنيش اذا يكون 6 خدامة , واحد يخدم و 5 يشربو في التاي , أما يفددني العرقلة و حشان الركايب على أشكاله المختلفة


working_overtime


الشيء الي يزيد من حالة القلق هذه هي انه موجود في السواد الاعظم من المشاريع الي نخدم فيها .. يعني مشلة مستعصية و مركبة و مش عارف كيفاش ماش نتجاوزها ... أعتقد اني في النهاية معادش ماش نعدل برشا اما انه يفهم روحو و ينقص من العرقلة و الا يكون استئصال الداء من جذورة أحسن وسيلة للشفاء


ضيعت برشا وقت , و ماش نمشي نقرأ شوية , و نحاول نعوض الوقت و نخدم حاجة تنفع


1225274637_85fac883b1


السلام عليكم

8 commentaires:

مصيبة اكا العمل الجماعي. الواحد يحل في وجهو شوارع مش يندب برك. هي في الاصل فكرة عظيمة، كي يبداو الناس الكل فرد مستوى، و م المفروض كوننو المستوى يبدا متقارب، لكن للاسف الشي هاذا مفقود عنا. و حتّى اللي يبدا الحلقة الاضعف في السلسلة مش يسكت، لا، لازمو يستعرض عضلاتو و يغطي عين الشمس بالغربال، مش هوا مضعضع، انت ما فهمتوش
ربي معاك يا هذا انا

ca te fera un peu mal tawa !!mais apres tu veras ca sera un tres bon souvenirs de tes années fac !!
jai été obligé de travailler avc bcp de sortes de con (prof et etudiants )mais apres avc mes mentions jai tous oublié !! aller courage et bon travails !
fakartni fi barcha 7ajet 7lowa ! ya 7asra ! :)

A mon avis il savoir dire non, pour divergence d'opinion. Perdre toutes ces heures pour n'aboutir à rien ce n'est pas productif du tout.Je pense qu'il faut partager les tâches aussi, chacun fait une partie et voilà. Ana sincèrement je n'ai compris le travail en groupe qu'à l'etranger avant je pensais que c'etait pour s'aider maintenant c'est une tache comme les autres mais répartie.

@bent 3ayla
أهلا باختي , و الله وخيّك يحاول انه يسلك روحو و يخرج باقل الأضرار ... الحلقات الضعيفة , مهياش ديما المشكلة , لكن فما فئة فيهم من الي يحبو الاستعراض , همّا المشكلة. يكف السيد الكريم ... الله يهدي ما خلق , و ربي يوفقك الجميع للي فيه الخير
في أمان الله

@ cactussa
أهلا بيك , صحيح ان كل الي يصير يخلي ذكرى و يكون في مرحلة ما ماهو الا ذكريات يتذكرها الفرد على هذه الفترة من الحياة و يوّد لو يرجع و يجربها , لكن المشكلة ان البعض يكون عالة على البقية و يمرر العيشة , و الله نحاول اني نستمتع بالوقت و بكل نهار نعيشه و نستفيد اكثر ما يمكن , لكن بعض العرقلة تعكر الميزاج :)
في أمان الله

@taxe
أهلا ... لو تتقسم الخدمة , متتوقعش انها ماش تكون خدمة في المستوى , لاني ماش نعمّل انهم خدمو الخدمة المطلوبة في حين انهم يكونو مخدمو حتى شيء أو تكون الخدمة خارج الموضوع المطلوب , كيف ما صار أكثر من مرة ... هذا في الحالة متاعي , لكن وقت تكون في حالة ان الجروب في نفس المستوى أو في مستوى متقارب وقتها ممكن نقسمو الخدمة ... على كل حال , مولها ربي :)
في امان الله

عجبتني التدوينة هاذي و انحب نعلق على حكاية الأستاذة الي مش متمكنة من الدرس الي تقري فيه... ماتنساش أنو الأستاذ هو بيدو انسان عندو طاقة استيعاب معينة يعني مش سوبرمان و احتمال يكون الدرس هذاكة هو مش فاهمو مليح (ساعات تصير أنو العبد مختص في مادة و لكن فما نقاط هو مش مستوعبهم مليح..) أما أنك أنت تسأل فهذاكة حقك و يلزمك تسأل و الأستاذ الي واثق من نفسو هو الي ميحشمش أنو يقول أنو سؤالك مهم أو أنو منتبهش للنقطة هاذيكة و بالتالي يولي يشرك الطلبة في البحث عن الاجابة و هكة يدخلهم في الدرس و الي يكون مش يتبع يولي يتبع و برشا نقاط تولي أوضح...هذا رأيي يا "هذا أنت" ههههه و نحب نقلك تدويناتك الكل باهيين...واصل

نوافقك في كل الي قلته :)
و فمّا شكون من الأساتذة الي قريت عندهم , وقت كان يجهل الاجابة كان يقلي انه معندوش فكرة عن الشيء الي نسأل فيه ,و كان يكبر في عيني :)

هذاكا هوّا , يحب يشكرك على تقديم رأيك , خاصة و انه يمثل رأي شخص مطلع على مجال التعليم العالي ;)

في أمان الله

أي أنا زادة نحب العباد الي كي تبدا متعرفش يقول منعرفش على خاطر حد ماعندو العلم المطلق...نحييك على سعة صدرك و على تدويناتك الحلوة ...حقيقة نستمتع كي نقرالك و نستمتع باختيارك للصور و بالذوق العام متاع المدونة
:))

و أنا أستمتع بوجود من يتابع المدونة مثلك :)

Enregistrer un commentaire

بسبب بعض المشاغل و القراية منّتجمش نتابع المدونة بشكل دوري, متقلقش اذا التعليق خذا وقت باش يتم ادراجه و الكلام الزايد يجعل ادراج تعليق صعيب شوية, نقص منه و تفضل قول اللي تحب , بالتوفيق

TUNISIA

TUNISIA

من أجل تدوين نظيف

!هذا أنا

Ma photo
حروف مبعثرة...برشا حديث وحكيات... كيف كل الناس

هذا أنا

بلوغ مثل اي بلوغ أخر.. موش لازم تقلق برشى من هذه الناحية ..... الايام كفيلة باش تعطيك الصورة الادق على المحتوى

أقوال تروقني

أنا من أشد المؤمنين بالحظ، وقد لاحظت أن حظي يزداد كلما زاد عملي

توماس جفرسون
الرئيس الثالث للولايات المتحدة الأمريكية

ضيوفنا الكرام