Hadhaa Ana!

... برشا حديث و حكيات

قرأ…نجح…تخرج…و بدأ يفكر في العرس…متقلقش برشا…لانه بدأ من مدة يلوج على البنية الي ممكن تعجبو…ممشاش لبعيد … ولقى في بنت بلادو حاجة اعجب بيها…و لأن المجتمع الي نعيش فيه يقيم الانسان بنسبة و العائلة الي ينتمي اليها …و لان المجتمع الي نسكن فيه , فيه عباد ترمي بناتها لمجرد اسم عائلة , كيف اسم تجاري متع ماركة ملقاش مشكلة في انه يخطبها …ويعرس

3_roses


مهمش بعاد ياسر في المستوى العلمي … و ان كانت هي خير منو…لكن كونو ولد عائلة …موش حكاية اخلاق و سمعة طيبة و انما ولد عائلة , و قت نقول ولد عائلة , تكمن قيمتو بمدى عتاقة جذور عائلتو في المنطقة… كانها صفراء معتقة متع أبو نواس … الي كان يحكي علها في أشعارو …ممكن تشوف واحد دبشو مقطع و شعر موش محجم و مهنتل و يجي يحكي معاك و يقيم خشمو , بحجة انه من دار فلان … الفقر و الكبر


اش عندهم دار فلان زايد؟ اش يميزهم ؟


و الله لا نعرف


يتولدوا كيف الناس عريا و بعد 9 شهور في كروش انماتهم … و يعشو كيف الناس …معطاهمش ربي عمر اطول منا … ويموتو كيفنا … و يجي يحكيلي على عايلتو


عباد معقدة …و موش حابة تفهم ان الفرق بين الناس موش في اسم العائلة و انما في الي يحققو كل واحد في حياتو


وقت جاء ابن العائيلة الكريم يخطب , رحبو بيه و شافو فيه الشاب الي يلبي رغبتهم…لانه ولد عائلة


اما خسارة , طلع صفر , طلع اسم العائلة و المجد القديم و العتاقة و …و ….و…و كل الاوصاف الي ممكن تتقال معندهاش اي قيمة , وقت عرس


18112268_0cd61f74ab

بعد العرس بان المستور و ظهر على حقيقتو … طلع ولد حرام , حتى بوه تحايل على مرت ابنو وبدأ يفكلها في الشهرية … اما هو , فكان يشوف فيها وسيلة لتفريغ شحنات من الشهوات الجنسية…و كيف كل الحلات جاب صغير و بدأ يكبر و بدأ اهتمام الاب يقل بمرتو و ببنتو و بدأ يبدل في رأيو و موش عاجبو الجو في الدار

اش يعمل؟

موش مشكلة , هو راجل أو بالاحرى “ذكر” , معندوش مشكلة , يشوف يتعرف على وحدة أخرى و يطلق القديمة و يكمل حياتو

الفكرة مكانتش بعيدة عليه … لانه سبق انه تعرف على وحدة اصغر من مرتو و زيد على هذا عندها كرهبة و دار , صحيح عندوا دارو , لكن مفها باس دار أخرى

وطلق مرتو و بعثها لدار بوها و منساش باش يبعث بنتو معها…اش يعمل بيها ؟ ناقص هو قلق؟


مقوها كلمت “عائلة كبيرة” و “ولد عائلة” و قداش نحبو المضاهر و النفخة الفارغة


نحنا في تونس … عندنا مرض مستشري اسمو “المظاهر” و عايشين على الكذب الفارغ


قداش نقعد باهت في عباد تصرف كل دينار عندها باش تشري دبش جديد و مريات ليكس و تلفون اي فون و توفى الشهرية من اول جمعة و نكملو الشهر على الــ0 , نبتو جواعة و كعبة البطاطا تتقسم علي في الدار و اهم حاجة الناس تقول علينا لباس


اذا شخص لابس كوستيم و موهر , نقولو اهلا سي فلان و اذا موش ظاهر عليه , ممكن منحكيوش معاه أصلا


عباد مريضة , وقت تجي تحكي على روحها تحاول انها تصور ذاتها على احسن ما يوجد , و قت تحكي على امجدها تقول فتوحات اسلامية أو كانها نابوليون أو ممكن الاسكندر , واقف قدامك ….اما وقت تحل الصرة , و قتها اني و زهرك … ممكن حتى الخيط متلقاهش


كل مرة نسمع شخص يحكي على انه ولد عائلة , نسخف عليه , لانه انسان مريض …يتصور كون ولد عائلة فهو أحسن من باقي الخلق


مجتمع مبني على المظاهر…مبني على الكذب


شفت شكون في الجامعة يتعمد يرمي باكو مابورو فارغ بعد ما فرغ قدام الناس حتى يبان انه لاباس عليه و يشري في باكو دخان ب4دينار


و شفت شكوت عامل فيها يتكيف في سيجار … موش سيجار سانتا مونيكا متع 200 دولار …لا متع 3 دينار , مجرد محاولة باش يبان لباس عليه…مخاخ فارغة


كل هذا وانا ساكت اما فديت وقت سمعت شكون تقول ان اختها خذات واحد من دار عائلة كبيرة – هذه عندها باك + 3 , و أول سؤال يطرح, هو اش يعمل في حياتو؟


!ردها كان , هو كون بنت خالتو طبيبة ,ا بن عائلة


الله أعلم , شكون ماش يصرف على صاحبو


عباد معجبة بروحها و قدرها اقل من قيمة “أوراق الحمام” – و ان كان الورق هذا أنفع

1

قداش مستشرية عقيدة “شعب الله المختار” , وقداش عباد غالطة في روحها … شفت شكون باك – 10 , اسمو ميعرفش يكتبو , جاهل , و مع هذا فما شكون قبل انه يصاهرو لانه ابن عائلة كيف ما عرفوه انسابو لان عندو عمارة باسمو …فهو ابن عائلة


يا شعب الله المختار…نحب نفرغ فيكم قلبي

anygrycat

6 commentaires:

افتخار الانسان بالمال والمظاهر ماهوش مشكلة اجتماعيّة كبيرة في حدّ ذاتو خاطرو يدلّ على مرض نفسي و فراغ الانسان هذاكة من أيّ انجاز شخصي .. المشكلة هيّ و قت اللي باقي المجموعة تعتمد "المقياس" هذاكة باش تقيس النجاح الاجتماعي للفرد و تمكّنو من "امتيازات" خاصّة كيف المصاهرة مثلا

عندنا زادة مشكلة الجّهويّة الليّ تخلّي البعض يظنّو أنّ مجرّد الانتماء لمدينة معيّنة يعطيهم قيمة في أعين العباد.. و العنصريّة موجودة زادة، ولو بدرجة ضعيفة

و الله يا خويا كلامك صحيح ساعات نحس روحي باش نتخنق مالتفاهة و السطحية متاع الناس لحكاية مل الكتاب للفاك قداش العبد تعذب في المكتب من جراير المظاهر و خيتك كليت على راسي على خاطر نقول أمي موش ماما بالفرنسية ..تصور.. و امبعد في الليسي تقولش العبد مخلوق مطلع ماتلبسش لوفيس و ما تعرفش تشطح و ما تعملش قعدات في داركم تقولش بينك وبين الناس حرب البسوس ..ومبعد في الفاك ما نحكيلكش شوف حتى في الخدمة دمّار راسى شاب وها المجتمع السطحي الذي يحمل أسفارا لا يهتم الا بالمظاهر و ياريت يتوقف عند حدود معقولة أنا عرفت ناس طيبين و متخلقين و صحاب مخاخ هايلة ولكنهم كلاو على راسهم وما وصلو لشي على خاطر المظاهر ..وهذا أخطر ما في الحكاية انو الرعاع والبهايم ولاّو مقدمين في كل شي و الناس المليانة كيمة قال القطوس ديفالوريزي لو كان الحكاية محدودة في الخلطة موش مشكلة.. الفيّاسة تعمل جهدها وكل اناء بما فيه يرشح ..أمّا المصيبة وقت البذاءة و السطحية يولّيو المقياس في المجتمع الكل من راسو لساسو هاك القطوس متاعك ينجمش يعطيني رصاصة رحمة خلّي العبد يرتاح ..وربي يسامحني و يعفو بينا .. كيف العادة مواضيعك هبال و يعطيك ألف صحة ولكن هل أنت مسمع أهل القبور ..

un complexe d'inferiorité qui parle hihi nchallah dans une autre vie tu seras incarné en weld 3ayla, en attendant ma 3lik ken ta3mel 'injezet ch5siyya' lool balekchi tete9bel enti zeda mouch ken houma loool

موضوع هايل عندو علاقة بالسطحية والواقع التونسي

الإعلام بتونس يتحول لأداة لنشر الفاحشة والتطبيع مع الإنحرافات

http://www.myportail.com/actualites-news-web-2-0.php?id=2980

@قطّوس الزبلة
أهلا بيك ,العنصرية موجودة و ان كانت مش باينة في العلافات اليومية , لكن تبان في المنسبات الاجتماعية كيف المصاهرة ... و ربي يشفي
شهاية طيبة

@guyguoz
أهلا بيك , العقلية الموجودة في المعاهد او حتى في مرحلة أبكر في المدارس هي مجرد انعكاس لثقافة الموجودة في البيوت... و اللطف على أختى من الموت
شاهية طيبة

@ Anonyme 1
يعيش خويا , برا العب بعيد...


شاهية طيبة

@Anonyme2

اهلا بيك و شكرا على اللينك
شاهية طيبة

Enregistrer un commentaire

بسبب بعض المشاغل و القراية منّتجمش نتابع المدونة بشكل دوري, متقلقش اذا التعليق خذا وقت باش يتم ادراجه و الكلام الزايد يجعل ادراج تعليق صعيب شوية, نقص منه و تفضل قول اللي تحب , بالتوفيق

TUNISIA

TUNISIA

من أجل تدوين نظيف

!هذا أنا

Ma photo
حروف مبعثرة...برشا حديث وحكيات... كيف كل الناس

هذا أنا

بلوغ مثل اي بلوغ أخر.. موش لازم تقلق برشى من هذه الناحية ..... الايام كفيلة باش تعطيك الصورة الادق على المحتوى

أقوال تروقني

أنا من أشد المؤمنين بالحظ، وقد لاحظت أن حظي يزداد كلما زاد عملي

توماس جفرسون
الرئيس الثالث للولايات المتحدة الأمريكية

ضيوفنا الكرام

Une erreur est survenue dans ce gadget