Hadhaa Ana!

... برشا حديث و حكيات


وقاف في المحطة , نستنى في الكار , بطات شوية … موش حاجة جديدة , نسمع في صوت غناية


“أخطاني, متفكرنيش يا صاحبي…في اللي هجرت ومشات “


تلفتت وريا لقت شاب في 18 او 19 على اقصى تقدير اذا موش اقل , وشادد في يدو التلفون و قاعد يسمع في

الغناية و ضاهرة عليه علمات التاثر … وجه عابس و عنين ذابلة و يتنهد………. التنهيدة جات من الاعماق

حست انه كان موش العباد موجودين في المحطة كان ماش يبكي … الله يصبروا

الحكاية متحتاجش برشا اجتهاد باش تعرف اش بيه


heart


تلفتت لقدامي و قعدت نفكر , اش عندي منحبش نتفكرو؟ … تفكرت عام الباك , برشا حكيات ضهر فيهم البعض راجل و البعض طلع على مراد الله , زدت فكرت اش عندي اخر ؟ قصة حب ؟


اش عندي ؟


بعد مطلعت في الكارو المطر بدات تصب … و بديت حتى انا نفكر


تفكرت ان من المحطة للدار تستنى فيا ثنية طويلة , صحيح هي 7 دقائق مشي لكن الي في الثنية يخليك في بعض الاحيان تقعد نصف ساعة باش توصل للدار , اول شيء و لان المطر تصب , عندي في المحطة الحلاقم متع الاوناس فايضة و العبور للطرف الاخر متع الشارع يستوجب عبور نهر من المخلفات البشرية الفائضة من الحلاقم…وبعد هذا عندي شارع طولو 400 متر لازم نمشي فيه , الشارع مفيوش “رصيف” كيف كل الحوم الشعبية , يعني نمشي في وسط الطريق و اذا ثما شكون عندوا كرهبا او كميون او حتى حشاكم حصان , بغل او بهيم وقتها تولي تختار اما تتعدى انت او تخليه يتعدى و يبلك بالماء و تمشي انت في غداير الماء و بالطبيعة فما شوية طين و شوية تراب ماش تمسخ بيها روحك… اش لزني نحب نتفكر ؟ موش كان استنيت حتى لين نوصل للمحطة احسن ؟


بعد الافطار , خرجت من الدار , كيف العادة , القهاوي معبية , و تبارك الله الشباب اكثر الرواد … مش مشكلة , كل واحد حر في حياتو … اش يهمني انه يقعد يلعب اربعة طراح رامي او بيلوت


كملت تعديت , و قبل ما نتعدى كلمت البعض الي نعرفهم , البعض عرفتهم و قت قراو معيا و البعض الأخر عرفتو من كثرت ما هو مرسم في القهوة الي في جنب الدار


وصلت قدام عطار , وقت شفت “كريم ” خارج من العطار و في يدو باكو دخان… منيش صحاب معاه , صحى , صحى , ممكن اذا جات العين في العين نكلمو و ممكن يتعدى كل واحد فينا و يعمل روحو مشافش لخر مناش صحاب … و حتى معرفتي بيه جات لانه جار واحد من اصحابي الي قراء معيا في الباك و من الليسي


كنت وقت نمشي لدرا صاحبي نلقاه و نلقى معاه عباد اخرين …ترسخة في ذهني صورت “كريم” على انه شخص غير منضم و منعزل ,موش بالساهل انه يعمل صدقات جديدة … و زيد على هذا كنت نشوف فيه انسان كثير الحزن , متشوفش على وجه ضحكة لمدة طويلة ,منكسر … على الاقل في الفترة الاولى الي تعرفت فيها عليه


في الليسي كنت نقرى في دروس دعم في الرياضيات و الفزياء , كيف اي تلميذ اخر , يطمح الى ما احسن , كنت نقرى مع مجموعة من اصحابي … مفماش شكوت يدخل يقرى معنا لانه يطيح الريتم … وهذه حاجة غير مقبولة … اكثر من مرة كان يقولنا الاستاذ ان المجموعة متعنا , هي احسن مجموعة , خاصة وقت شاف المعدلات الي كانت اقوى ما فما في على مستوى الليسي…في الحصة هذه كل واحد جاب يوري فيه في الحوايج الي غلط فيهم … كل واحد يطمح باش ياخذ 20 ,بعد ما كمل الاطلاع على الاوراق , سكت الاستاذ و بعد قال ان عنده تلميذ , قالق عليه , كان في نهار من النهارت تلميذ ممتاز , تلميذ يضرب به المثل , في المستوى و في الذكاء و في الخدمة , قال انه موش عارف اش صار معاه…كان كيف اي واحد في الجروب ياخذ في اعداد مميزة لكن … الله اعلم اش صارلو


بعدها , قعد يسأل , فماش شكون يعرفو؟ فمشا واحد يعرف اش صار معاه؟ قعد يستفسر فماش شكوت يعرف شبيه كريم تبدل…لكن مفماش اي اجابة


موش غريبة على هالاستاذ انه يسأل على تلامذتو , لانه وصل يمشي لديارهم ليقنع البعض بانه يرجع في قرار تبطيل القراية رغم كونهم من المتميزين … عباد تصيبهم نكسة و تولي معادش عندها كيف في القراية و كان اذا واحد من التلامذة يجيه في اي وقت باش يستفسر على حاجة كان يسهر معاه


بعد ما خرجنا من بجذاه , واحد من اصحابي , جبد الحكاية متع التلميذ الي كان يحكي عليه استاذ الفيزيك , و قال ان كريم اغرم في بداية قراتو في الليسي بزميلة , و “حبها” و تعلق بيها … و بدأ يكتب في الاشعار و يهيم بها حب … لكن لسوء حظه تجري الرياح بما لا تشتهي السفن , كان حب من طرف واحد


n1431722376_4437


بدات تتعكر حالتو النفسية و بدا يتغير و بدا مستواه يتراجع و تغير كريم … تحول من تلميذ عندوا 15 معدل الى تلميذ ينجح ب10 او بالاسعاف و بجهد جهيد


وحتى الي حبها , محبتش انها تسايرو , رغم ان فما شكون من اصحابو كلمها و قلها على اللي صار…كلموها وقت شافو صاحبهم معادش تعجب احوالو


rose rouge


و بدأ الامل يفقد في انه يتحسن او يرجع الى ما مضى من مجد… رغم محاولات بعض اصحابه و محولات اساتذتو , لكن لا حياة لمن تنادي … حتى واحد مكان يحب او ينجم يقول انه الحكاية ورها مشكلة عاطفية للاساتذة الي تسال , كانت الاجابة : لا اعرف … الله اعلم


2423171764_786b6a6806_b


اليوم وقت شفته , تذكرت حكايتو … شفت انسان كان يتوقع ان يكون عندوا مستقبل الى شخص ينجح بجهد جهيد و حتى التخصص الي اختاره بعد الباك الي نجح فيها من المرة الثانية, ميستحقش انه يذكر … انسان ضاع مستقبلو من قدامو و هو يتفرج


sad_man


صحيح ان القراية موش كل شيء و ان شخصية الانسان و اخلاقو هي من اهم الحوايج الي يكتسبها من الدنيا …لكن انك تشوف انسان يتحول الى ذكرى انسان ,هي بحد ذاتها مشكلة خاصة وقت يكون الانسان السابق واحد كيف هذا


كريم , موش وحدو الي صارتلو الحكاية هذه , عرفت برشا كيفه من زملائي و حتى اساتذتي و لولى رحمت ربي لكنت مثلهم , ثما شكون تجاوزها و ثما شكون تحطم و خرج من اللعبة…و ثما شكون قعد يتعايش مع الي صارلو و اذا تذكر الحوايج اللي اجتهد باش ينسها يعدي مدة في حلة اكتئاب


وفما شكون كان يحب ينتحر كان قريب من الموت , في حالة اكتئاب شديد , يبكي كل يوم قبل ما يرقد , مينجش يرقد مرتاح , ديما سارح , ديما يفكر , ديما حزين …يرقد , يطير عيله النوم… يخرج , يقعد منعزل عن العائلة متعو و اصحابو


rose_givre


و “من الحب ما قتل” و من الحب ما حطم و ضيع الحاضر و المستقبل


sad-man-forehead-on-the-wall


فما شكون قال ان كريم و غيره , هما كيف انسان ضيع حياتو في سبيل وهم , مجرد سراب, و انه موش حب حقيقي كيف ما يوصف و انه مجرد فترة مر بيها و كانت نتيجة فراغ عاطفي , الشيء الي خلاه يحس انه يحب و يعيش قصة حب خاصة مع الاغاني الي كان يسمع فيها الي تصور الحالة على انها قصت حب رومنسية وانه كذب كذبة على روحو و صدقها… و يستشهد بحالتو بعد ما عرس ولى نادم … كانت عندو صورة عن الشخص الي حبو وبعد العرس تعرف عليه اكثر, تبدلت الصورة الي كانت عندو


اش صار ؟ اش تبدل؟ العباد نفسهم , اما الشعور تغير … هذا الكل يحيرني , وقت نشوف شكون كانو يقولو انهم يحبو بعضهم و قعدو “أصحاب” أو على علاقة لاكثر من 7 سنين و بعد 6 شهور من العرس , يحبو يطلقو


و فما شكون يقول انه مكانش غالط في اختيارو , و انه ميزال يحب الشخص الي حبو وقت قرا معاه و لليوم ميزالو متفاهمين بعد اكثر من 10 سنين من العرس… و ان الحب يجي بالعشرة


منحكيش على يلعب بمخ بنت ناس او العكس , انها تلعب بمخو و بعدين تبدل “الصديق” بواحد اخر في جمعة , او أقل كيف الي نشوف فيهم في الجامعة , مجرد وقت فراغ يم التخلص منه بالصحبة “الطيبة” و كل ما تلقى شاب أوسم , أثرى , مستعد انه يصرف علها و يسهرها , تشد فيه و تعيشو الوهم


ميزلت نتفكر , كيفاش سألتنا أستاذة الفرنسية في السنة ثانية ثانوي, عن الحب , كان عندنا محور كامل عن الحب


“ عرف الحب و الهدف منه”


بعد ما سمعت الاجبات المختلفة , ضربت روحها بكف قدامنا و مهياش مصدقا اش قعدا تسمع… خرجت تبدل في الهواء قدام القسم و رجعت و قعدت تحكي , كيفاش الشيء هذا أكبر منا


وقتها نتفكر ان واحد من زملائي قلها في سخرية

“c’est juste pour charger le temps “


كل واحد يحكي حكاية … و الشيء المؤكد هو ان كريم ضاع … و تبخرت الاحلام متعو و متع عايلتو

2 commentaires:

الأغاني عندها دور كبير في تضخيم صورة الحب و تولي تشوف الطرف المقابل مثالي أكثر من اللازم بش تشوفو في الصورة الي تصورها الأغاني و بالتالي تبعد على العقلانية و ماتشوفش في الطرف المقابل هل هو فعلا يصلحلك و الا لا و هذا في نظري من أسباب فشل الزواج بعد علاقة سنين...تدوينة حلوة
أحييك

أغاني لفاضل شاكر و اليسا و أفلام رومنسية على
mbc 4
و معها فراغ عاطفي ... كفيلة بانها تغير الحالة النفسية لشاب أو حتى كهل... و خاصة ان المجتمع متعنا يحب المضاهر ... اذا احد الطرفين عندو فلوس , فهي كفيلة بتغيير الموازين

صحيح موش الناس الكل... لكن كان تشوف سر الحب في عدد كبير من الحلات ... تلقى ان الحب موش لشخصية الطرف الاخر أو لذاته و انما لجمال قد يزول أو لمال قد لا يدوم
لكن هذا ميمنعش ان البعض يصدق في مشاعرو ... و ان كانت العواقب احيان وخيمة...

دمت بود , شاهية طيبة

Enregistrer un commentaire

بسبب بعض المشاغل و القراية منّتجمش نتابع المدونة بشكل دوري, متقلقش اذا التعليق خذا وقت باش يتم ادراجه و الكلام الزايد يجعل ادراج تعليق صعيب شوية, نقص منه و تفضل قول اللي تحب , بالتوفيق

TUNISIA

TUNISIA

من أجل تدوين نظيف

!هذا أنا

Ma photo
حروف مبعثرة...برشا حديث وحكيات... كيف كل الناس

هذا أنا

بلوغ مثل اي بلوغ أخر.. موش لازم تقلق برشى من هذه الناحية ..... الايام كفيلة باش تعطيك الصورة الادق على المحتوى

أقوال تروقني

أنا من أشد المؤمنين بالحظ، وقد لاحظت أن حظي يزداد كلما زاد عملي

توماس جفرسون
الرئيس الثالث للولايات المتحدة الأمريكية

ضيوفنا الكرام

Une erreur est survenue dans ce gadget