Hadhaa Ana!

... برشا حديث و حكيات

استكمال لما سبق , من تدوينة ياباني في تونس ج4

وصلت قبل بدأ الحصة بــ 20 دقيقة لاني مليت البخس وقت نوصل مخر , صحيح مكانش يشد ياسر في الحكاية لكن مخاطبته لي في أخر مرة حكيت معاه فيها خلاتني نحشم على روحي

قعدت نتبع فيه كيفاش قاعد يتصرف , و هو ساكت … شيء غريب , ديما ساكت ؟ ميحكيش وحدو؟ ميكشش ؟ ميخرننش ؟ انسان من عالم أخر …

على ما يبدو ان هذا الاستاذ تشرب حديث رسول الله , عليه الصلاة و السلام “من كان يؤمن بالله واليوم الآخر ، فليقل خيرا أو ليصمت” … يا و الله عجب في الاستاذ ممكن هو حالة خاصة لكن الي شفته ان اليابانين الي عرفتهم مهمش عاطفيين كيفنا ممكن الي عرفتهم مش كيف الباقين لكن هذا الي صار… و كان مستغرب كيفاش ان كل الاقسام الي يقري فيهم كانوا يسألو في أول حصة على كيفية قول “"نحبك” باليابانية , و الجميع كان متشوق باش يتعلمها … و كانت اكثرة جملة حفضنها و عرفنا نكتبوها

و عطانا عبرات مقاربة لمعنى: نحبك


あなたをとても愛しています

“نحبك برشا”


Eichhörnchen_Düsseldorf_Hofgarten_edit


استغرب , و قعد باهت لكن اصرارنا على التعلم و معرفة كتابتها و استخدامها … كل واحد يحب يعبر على مقصودوا

في العالم العربي تعيش و تشوف زاد برشا حوايج … { قلها نحبك } … مفكرتش برشا , و سألته : علاش انتوما متحبوش ؟ ممكن سؤال كيف هذا كفيل بش يجيبني على برى مع استاذ تونسي


رد عليا في برودة أعصاب : “لا , نحبوا … اما منقولوش نحبك”


____Japanese_Girl_____by_CarolGar6


تصدمت, شعب متطور و ناشط جداا و متقدم و معندهمش كلنت نحبك ؟ بربي يأخي من شدة الضغط الي يعشو فيه نساو باش يعملو كلمة يعبروا فها على الحب ؟ حتى الحب مبدل عندهم ؟…على الاقل حاجة فتناكم بها


ممكن الحب متعنا موش باين في الحياة اليومية بالشكل الكافي … و ان كان تم تعوضيو توى بعلاقات شدان ايد و عدّي {علاقة... عابرة} … { قلها نحبك } …قعدت نفكر , للدرجة هذه اليابانين باردين في علاقاتهم ؟ قلوبهم حجر ؟ موش كيفنا ؟ في كل جريدة من الوطت العربي تحلها تقى فيها قصة واحد عمل حاجة في حياتوا يقلك “برغم الضروف الصعبة و التحديات و …” كانك تقرأ في حكاية فتح الأندلس و الا في موضوع استعطاف … باش تسخف عليه و تحس بيه …


من غدوة متعدي في الجامعة نشوف في طالبة نعرفها بحكم انها قرات معيا , و اذا بيا نشوفها شادة يد شاب اصغر منها … حاجة متخصنيش و تعديت , جات عني في عينها , سلمت عليها و كملت ثنيتي … العشية مروح للدار نشوف فيها جاية للمحطة واقفة قدام الكار , و قت هبط شاب اكبر منها , ممكن عمرو 27 سنة , و اول ما شافها بدأ العناق و تبادل للاحضان … قعدت باهت , اش صار بين الصباح و العشية ؟ ايا باهي … صار موش كان الاولاد تلعب بمخاخ البنات … هاو طلعت انا ساذج و الاسذج مني هو صديقها الي عاملتوا لفترت الدراسة و اثناء تواحجها في الجامعة … يعني شدان يد و طيش


844471573_small


فما حاجة موش عادية فينا , الحب عنا شيء يحشم , و اذا قلنا كلمت نحبوا تشوف العباد تحتقرك و اذا كنا وحدنا نقلوها في خفية و الامثلة كثيرة …


هذا بخلاف انا نحبو الضرب الصحيح , كيف ضرب اللوغة و السلعة المضروبة و نحب نغشو و نحب نضربوا ضربتنا في العباد خاصة اذا سائح أو شخص أجنبي و نحبو نعفسو العباد و نحبوا الناس تصبح علينا و نحبوا الثنية تكون كان لينا و نحب نعاملو العباد كانهم خدامة عندنا و نحبو نتشيفو على العباد و نحبو الكذب و شكون يقلنا يعطك الصحة يا معلم يا سي فلان و و نحبو نكونوا قدام الناس لاباس علينا و نضهرو اثرياء حتى ان كلفا الامر نكملو بقية الشهر بلا مصروف و نحبو زادة كل خير للي نحبوهم …


angel


وقت تشوف شكون يسب ابنو و ينعتوا بــعبرات “بهيم” وقت ميضربش ضربة باهية اول ما يلقى فرصة اش تنجم تقول ؟ وقت تلقى شكون يقول للسارق سيدي اش تقول؟


و تشوف من العباد شكون يحب يقمر و يحب يشرب و يحب يعصي جهار و يحب يعربد و يصرف في الفساد على كيف كيفو و ابنوا عريان, جيعان, مسخ ,يجري حفيان في الشارع


poker


جاري عانوا اسطول متع سيرات اجرى , و قت جاء يطهر لولدوا قعد يختفل 7 ايام و 7 ليالي , كل يوم حفلة , متعدي للحانوت الي بحذى الدار , سالت جاري العطار , اش فما في الحومة و انا مفيباليش بالهدرة وقتها , قالي ان السيد هذا ضرب 200 مليون من عند فرع شريكة كان مسؤل عليه و وقت مقاش عليه عرفو اي اثبات , خرج منها كيف الشعرة من العجين , و توى ولى سي فلان


referencement-de-site-internet


الحب عندنا حلو ياسر … خاصة وقت تشوف شكون يتمنيك على العباد لانه خذى شخص يحبه و هو عايش في النكد… و تشوف عباد تحب من الدنا هذه كان انها تنكد على غيرها …


اذا كنت تعمل في حاجة و الي في جنبك موش عاجبتو , اول حاجة يعملها هي يعربلك على حبو ليك و يقلك سيب عليك … قداش قوي الحب عندنا


وقت يشوفك قاعد تحدم بجدية يقلك و الله نحبك و نحب راحتك و موش باهي لصحتك

وقت تكون تضحك يقول اش يضحك فيك ؟

وقت تتبسم يقولو اش بيه هذا ؟

smile



ضحكت فقالوا ألا تحتشم
بكيت فقالوا ألا تبتسم
بسمت فقالوا يرائى بها
عبست فقالوا بدا ما كتم
صمت فقالوا كليل اللسان
نطقت فقالوا كثير الكلام
حلمت فقالوا صنيع الجبان
ولو كان مقتدرا لانتقم
بسلت فقالوا لطيش به
وما كان مجترئا لو حكم
يقولون شذ اذا قلت لا
وإمعه حين وافقتهم
فأيقنت انى مهما اردت رضا الناس
لابد من أن ُأ ذم


لكم مني كل حب … دمتم بود

0 commentaires:

Enregistrer un commentaire

بسبب بعض المشاغل و القراية منّتجمش نتابع المدونة بشكل دوري, متقلقش اذا التعليق خذا وقت باش يتم ادراجه و الكلام الزايد يجعل ادراج تعليق صعيب شوية, نقص منه و تفضل قول اللي تحب , بالتوفيق

TUNISIA

TUNISIA

من أجل تدوين نظيف

!هذا أنا

Ma photo
حروف مبعثرة...برشا حديث وحكيات... كيف كل الناس

هذا أنا

بلوغ مثل اي بلوغ أخر.. موش لازم تقلق برشى من هذه الناحية ..... الايام كفيلة باش تعطيك الصورة الادق على المحتوى

أقوال تروقني

أنا من أشد المؤمنين بالحظ، وقد لاحظت أن حظي يزداد كلما زاد عملي

توماس جفرسون
الرئيس الثالث للولايات المتحدة الأمريكية

ضيوفنا الكرام

Une erreur est survenue dans ce gadget