Hadhaa Ana!

... برشا حديث و حكيات

مشهد رقم 1

مروح الخمسة متع العشية للدار, تاعب بعد جولة مسائية لللياقة البدنية و الجري على الكورنيش, و اذا بيا نشوف في جارتي في الحومة, عملت روحي ماشوفتهاش و تعديت, بعد نهار زدت شوفتها على الصباح ماشية للخدمة وتكررت الحكاية أكثر من مرة… الشيء الي أثار الاستغراب…لا لشيء الا كون جارتي هذه معرسة من اربع سنين بشخص قالوا عليه وقتها ولد عائلة , و تسكن بعدية عن الحومة


wedding-rings


الي نتذكرو هو كون زوجها صاحب تحصيل علمي باك +3 و قريب الها في العمر لكن منيش فاهم كفاش خذاتوا؟ لانها كانت متميزة في الدراسة ووصلت خذات جائزة رئيس الجمهورية في الباك متعها قبل ما تكمل تحصيلها الدراسي باش تولي مهندس مع راتب مميز…و حتى وقت حكيت مع راجلها في بعض الموضيع المتفرقة قعد عندي الانطباع بانه شخص عادي جدا , لكن كل هذا في ناحية و وجودها في الحومة بهذا الشكل خلاني نستغرب بشدة, و تعدات الايام و تعودت على رايتها مع بوها الي يقوم بتوصيلها من المحطة للدار, بالطبيعة موش دارها , و انما دار بوها…الشئ هذا خلاني نقول ممكن مشاكل صاير و ما هي الا شيء عادي بين اي زوجين… لكن سمعت من أحد افراد عائلتي الي رجع للدار متاثر بعد ما حكى معها انها متعاركة مع راجلها و هي الان مش تتطلق منوا.…مكنتش مهام بالامر لكن الشيء الي خلاني نقعد باهت هو كونها عندها صغار فقلت ممكن مشاكل مع دار حماتها او شيء من هذا القبيل و ان الحكاية ممكن تتحل لكن بعد ما عرفت ان زوجها الكريم مصاحب علها شابة اصغر منها و وصل جابها للدار…فهمت ان المصيبة الي حلت بها موش شوية استغربت , لانهم كانو يمدحوا فيه في السابق كونوا ولد عائلة و لاباس عليه و برشى حديث من هذا النوع

لكن مفما شيء يقعد على حالوا… وهذه عائلة مش تضيع…و أكثر شيء مقلقني هي البنيت الي عندها… شنو ماش يكون ردها وقت يقلها معلم او اي شخص يقرأ مهعا وينو بوك؟

او وقت يجيء أحد الأطفال الي يقرا معاها في الروضة او حتى بعدين في المدرسة و يحكي ببرائة عن مغامرتو مع بوه …كيفاش حوسوا و لعبو وروحوا العائلة كاملة مع بعضهم

شنو ممكن يصير و قت توصل سن المراهقة و ما تلقاش الاب؟ ثما حاجتين ممكن تصير, الاحتمال الاول هو فقدانها الثيقة في الرجال الشيء الي ماي يخلي اي علاقة لها مع من حولها ضعيفة جدا وحتى اذا هي في يوم من الايام ارتبطت ممكن مخلافات هذا الامر تقعد تلازم فيها و الاحتمال الثاني و الي هو الاخطر هو كونها ماش تحاول تعوض غياب الاب بشخص ثاني و ربي يستر وقتها اش ممكن يصير…الشيء الوحدي الي ممكن نقولو هو الله يسهل الي فيه الخير لها و لامها الي ميزالت مغلقتش الثلاثين من عمرها, و موش من الساهل ادماج المطلقات في محتمعنا و حتى لو الام ماش تتدخل لحماية الابنة عن طريق طبيب نفسي , يقعد المجتمع عقبة لا يستهان بها… ربي يسنر من الي ممكن يصير

مشهد رقم2



fondant_wedding_cake_flowers-239x320 (1)


شابة في ربيعها العشرين , لعدة اشهر , واحد من الشباب الطموح الراغب بالتعرف على زوجة تخدم يراقب و يسئل و يتبع فها و بعدين مشاء خطبها , الشابة هذه عادية مفماش شيء يميزها في الجمال او النسب , لكن هي ديما تدخل وتخرج من مؤسسة مرموقة , شيء يعمل الكيف

جاء سي الشباب و تعرف على الدار و خطبها … يعد مدة عرف انها موش تخدم في الشريكة, بل هي مجرد متربصة و مفماش اي شيء مؤكد باش يتم ادخالها للخدمة فها…الشيء الي أثر بشكل كبير على الطموح بشرهية ثانية في الجيب و خلى الشاب الكريم يفسخ الخطبة

مشهد رقم 3


wedding cake pink flowers


أستاذة فلسفة, تخرجة حديثا, و كثرو الخطاب على الباب, و الناس الكل ولات تحب تاحذها , الرجال كثرت , الكل يحب يستحسن, و في النهاية جاء واحد قالو عليه ولد عائلة و هات من لحديث………خطب,و عرس … لكن مرتوا منجحتش في الكباس,و تعدى عام و اثنين و ثلاثة, و الى الان الشيء الي كان يتوقعوا موش ماشي….حتى الشهرية الي كان يحلم بها من خدمتها و من الدروس الخصوصية مفماش, حتى الفلسفة فما شكون مسيطر على سوقها من اساتذة عندهم سمعة طيبة…والسوق ما يرحمش الجديد

و بعد مدة اكتشفت ان ابن العائلة الكريمة زاني , والشيء الي كان يخبيه موش شوية , وبدات المشاكل و بدا يضرب فها و يضرب في ابنوا حتى وصلت احدى الاصبات الى 27 غرزة في راس ابنوا الي عمروا ممكن اربعة سنين بعد مجاه كف شماتة في اموا خلاه يطيح على راسوا…و توا هي غضبانة و تحب تطلق

مشهد رقم 4


wedding_cake_simple_elegant


مهندس متخرج حديثا , تعرف على زميلتو من ايام الدراسة و بعد ما تخرج تزوج بها , برشا قواسم مشتركة بينهم , التحصيل العلمي و المعرفي و الاكثر من هذا نفس الافكار الي ممكن تجمعهم و تخليهم يعيشو في سعادة وهناء, في العرس صرف 20 مليون و مكانش يشوف فيها مبالغة بخلاف الي صرفوه دار نسابوا…بعد ثلاث شهور, السيد الكريم يحب يطلق

وكانت صحيفة "الصباح" المستقلة نشرت أمس السبت مقتطفات من دراسة أعدتها وزارة شؤون المرأة والأسرة التونسية، أشارت فيها إلى أن عدد حالات الطلاق المسجلة خلال العام الماضي بلغ 9127 حالة، مقابل 16 ألف حالة زواج.

بقية المقال من موقع العربية

0 commentaires:

Enregistrer un commentaire

بسبب بعض المشاغل و القراية منّتجمش نتابع المدونة بشكل دوري, متقلقش اذا التعليق خذا وقت باش يتم ادراجه و الكلام الزايد يجعل ادراج تعليق صعيب شوية, نقص منه و تفضل قول اللي تحب , بالتوفيق

TUNISIA

TUNISIA

من أجل تدوين نظيف

!هذا أنا

Ma photo
حروف مبعثرة...برشا حديث وحكيات... كيف كل الناس

هذا أنا

بلوغ مثل اي بلوغ أخر.. موش لازم تقلق برشى من هذه الناحية ..... الايام كفيلة باش تعطيك الصورة الادق على المحتوى

أقوال تروقني

أنا من أشد المؤمنين بالحظ، وقد لاحظت أن حظي يزداد كلما زاد عملي

توماس جفرسون
الرئيس الثالث للولايات المتحدة الأمريكية

ضيوفنا الكرام

Une erreur est survenue dans ce gadget